Բելառուս ընդդիմադիր, «Եվրոպական Բելառուս» ընկերության համակարգող, Սաննիկովի վստահված անձ Դմիտրի Բոնդարենկոն, ով ձերբակալվել էր 2010 թ. դեկտեմբերին՝ Մինսկում ընդդիմադիրների բողոքի ակցիային մասնակցելու համար, ազատ է արձակվել: Այս մասին Interfax գործակալությանը հայտնել է նրա կինը` Օլգա Բոնդարենկոն:
Հիշեցնենք, որ նախօրեին Բելառուսի նախագահ Ալեքսանդր Լուկաշենկոյի հրամանով ազատ էր արձակվել երկրի նախագահի նախկին թեկնածու Անդրեյ Սաննիկովը, ով դատապարտված էր հինգ տարվա ազատազրկման:
Ներկայումս շարունակում են ձերբակալված մնալ 10 բելառուս ընդդիմադիրներ և ակտիվիստներ, որոնց իրավապաշտպանները համարում են քաղբանտարկյալներ: Ձերբակալվածների թվում են նաև 2010 թ. Բելառուսի նախագահական ընտրությունների թեկնածու Նիկոլայ Ստատկևիչը, Բելառուսում չգրանցված «Երիտասարդ ճակատ»-ի առաջնորդ Դմիտրի Դաշկևիչը, «Բելառուսի ազգային ճակատ» կուսակցության ակտիվիստ Սերգեյ Կովալենկոն, ով մի քանի ամիս է, ինչ հացադուլ է հայտարարել:
Հայտնի է, որ Սաննիկովը և Բոնդարենկոն դիմել էին Լուկաշենկոյին` համաներում ստանալու խնդրանքով։
