Այսօր լրագրողների հետ հանդիպմանը Դեմոկրատական կուսակցության հանրապետական խորհրդի անդամ Արամ Գյուրջյանը, խոսելով իրենց կուսակցության ծրագրերի մասին, նշեց, որ ՀՀ-ին անհրաժեշտ են համակարգի լուրջ փոփոխություններ, հատկապես հասարակության բարոյահոգեբանական ոլորտի հարցերում:
«Վերջերս խոսում էի մի երիտասարդի հետ. նա նշեց, որ ինքը մեր երկրում փոքր մարդ է, որը շատ բան է ասում մեր ժողովրդի բարոյահոգեբանության մասին, սակայն պետք է հասնենք նրան, որ բոլորը հասկանան, ինչպես նաև ականջներին օղ անեն, որ ՀՀ քաղաքացին չի կարող իր երկրում փոքր մարդ լինել»:
Գյուրջյանի հավաստմամբ՝ իշխանությունների ոհմակային մտածողությունը բերել է նրան, որ մեր ժողովուրդը ամբողջովին հուսալքված է, ինչ արդեն 20 տարվա ընթացքում ձևավորված համակարգի արդյունքն է: Մինչև չլուծվի ժողովրդի բարոյահոգեբանական խնդիրը մենք չենք ունենա հաջողություն մյուս խնդիրների հարցում: Նրա խոսքերով՝ սա նաև անվտանգության լուրջ խնդիր կարող է հանդիսանալ, քանի որ բարոյալքված հասարակություն ունեցող երկիրը ավելի շատ կարող է ենթարկվել արտաքին ճնշումներին, ուստի պետությունը պետք է սոցիալական պատասխանատվություն կրի քաղաքացիների առջև: Այն չպետք է մոռանա իր ուղղորդող դերի մասին. եթե ստանձնի իր պարտավորությունները և դրսևորի քաղաքական կամք, կլուծվեն բոլոր խնդիրները:
Հայաստանի դեմոկրատական կուսակցությունը որպես հաղթաթուղթ առաջարկում է կիրառել դեմոկրատական սոցիալիզմի մոդելը: Այսօրվա նեոլիբերալ համակարգում մարդկանց ասվեց՝ պետությունը վատ մենեջեր է, արեք ինչ ուզում եք, սակայն դրա համար չստեղծվեցին համապատասխան պայմաններ, ուստի պետք է ապահովել պետության մասնակցությունը այնքանով, որքանով անհրաժեշտ է և մասնավոր սեկտորի մասնակցությունը այնքանով, որքանով հնարավոր է:
Խոսելով ակնկալվող հաղթանակի մասին՝ Արամ Գյուրջյանը նշեց, որ իրենք հաղթանակը տոկոսներով չեն ակնկալում, բայց, այնուամենայնիվ, 10 տոկոս ձայների ակնկալիք ունեն և վստահ են, որ մեր հանրապետությունում կա բավականին լուրջ քանակությամբ մարդիկ, ովքեր կարողանում են ինքնուրույն մտածել: «Մոտ 30 տոկոս մարդիկ կան, ում հետ քարոզարշավների ընթացքում մենք ակտիվ համագործակցելու ենք, ես վստահ եմ, որ նրանք չեն ենթարկվում այս կամ այն ազդեցությանը, ընտրակաշառքներին և այլ արատավոր երևույթներին»:
