Մալիի հյուսիսում նոր իսլամական պետության առաջացումը ցանկալի չէ Ֆրանսիայի համար, սակայն Փարիզը մտադիր չէ այնտեղ զորք ուղարկել: Այս մասին այսօր հայտարարել է Ֆրանսիայի նախագահ Նիկոլա Սարկոզին` ելույթ ունենալով երկրի հեռուստաալիքներից մեկով:
Հիշեցնենք, որ Մալիի հյուսիսային հատվածում պետական հեղաշրջման հետևանքով Մալիի հյուսիսային հատվածը հայտնվել է ապստամբ տուարեգների ու իսլամիստների խմբի հսկողության տակ:
«Անհրաժեշտ է անել հնարավոր ամեն բան, որպեսզի խուսափենք Սախելեում (Սահարայի անապատի հարավային հատվածը, որն ընկած է Մալիի հյուսիսային հատվածում) ահաբեկչական կամ իսլամական հանրապետության առաջացմանը»,- ասել է Սարկոզին` ի պատասխան տարածաշրջան ֆրանսիացի զինծառայողներ ուղարկելու հարցին: «Չեմ կարծում, թե դա պետք է անի Ֆրանսիան»,- ասել է նա: Այս մասին հայտնում է ITAR-TASS գործակալությունը:
Նրա խոսքով` Մալիում իրավիճակի կայունացման մեջ կարող էին մեծ դեր կատարել այնպիսի կազմակերպություններ, ինչպիսիք են Արևմտյան Աֆրիկայի երկրների տնտեսական կազմակերպությունը ` հարևան երկրների` Մավրիտանիայի ու Ալժիրի հետ միասին: Մալիի գործերին միջամտելու որոշումը, ըստ Ֆրանսիայի նախագահի, պետք է կայացնի Աֆրիկյան միությունը:
