Hürriyet Daily News-ի փոխանցմամբ՝ Հայոց ցեղասպանության 97-ամյակի նախաշեմին թուրքական երկու հասարակական կազմակերպություններ պլանավորել են Թուրքիայում անցկացնել մի շարք ցույցեր՝ նվիրված 1915 թվականին Օսմանյան կայսրությունում սպանված ու բռնագաղթեցված հայերի հիշատակին ու ռասիզմի դեմ պայքարին:
Գլխավոր ցույցը տեղի է ունենալու Ստամբուլի Թաքսիմ հրապարակում, իսկ ապրիլի 24-ից օրեր առաջ բողոքի ակցիաներ կիրականացվեն Անկարայում, Իզմիրում և այլ քաղաքներում: Այդ ամենը կազմակերպելու են «Մարդու իրավունքների միությունը» և «Ո՛չ ասենք ռասիզմին» շարժումը:
«Մարդու իրավունքների միության» անդամ Այշե Գյունայսուն հայտարարել է. «Մենք այդ միջոցառումների անցկացումը հիմնավորում ենք նրանով, որ Հայոց ցեղասպանության ճանաչումը հանդիսանում է էթիկական, իրավական, քաղաքական ու սոցիալական պատասխանատվության իրագործում:
Կեղծիքը չի կարող ոչ մի հանգամանքներում հավերժ շարունակվել, եթե մենք ցանկանում ենք տեսնել ճշմարտությունը: Այդ վշտի ճանաչումը կհանգեցնի Թուրքիայի իրական ժողովրդավարացմանը, ռասիզմն ու ատելությունը կկորչեն ոտքերի տակ, և մենք կկարողանանք մոտենալ մարդկային կյանքին»: