«Գազպրոմ» ԲԲԸ-ն կենտրոնական գրասենյակում ապրիլի 11-ին տեղի է ունեցել «Գազպրոմ» ԲԲԸ Վարչության նախագահ Ալեքսեյ Միլլերի և «ՀայՌուսգազարդ» ՓԲԸ վարչության նախագահ – գլխավոր տնօրեն Վարդան Հարությունյանի աշխատանքային հանդիպումը:
Հանդիպման մասնակիցները քննարկել են 2012-2013 թվականներին Հայաստանի սպառողներին մատակարարվող ռուսական գազի գնագոյացման հարցերը, հայտնում է «Գազպրոմի» տեղեկատվական կենտրոնը:
«ՀայՌուսգազարդ»-ից «Առաջին լրատվական»-ին հայտնեցին, որ բացի այդ, կողմերը քննարկել են Հայաստանում գազաէներգետիկ նախագծերին «Գազպրոմի» մասնակցության վերաբերյալ համաձայնագրերի իրականացման ընթացքը, ինչպես նաև անդրադարձել են «ՀայՌուսգազարդի» գործունեության արդյունքներին: Մասնավորապես, մատնանշվել է Հրազդանի ՋԷԿ-ի 5-րդ էներգաբլոկի շահագործման հաջող գործարկումը, որը հնարավորություն է տվել ապահովել էլեկտրաարտադրման հայկական շուկայի զգալի մասը և մեծացնել էլեկտրաէներգիայի արտահանման ծավալները դեպի հարևան երկրներ:
