«Հայաստան» համահայկական հիմնադրամն ավարտել է Երևանի Նորքի տուն ինտերնատի «Ա» մասնաշենքի III և IV հարկերի ամբողջական վերանորոգումը, ներառյալ աստիճանավանդակի վերանորոգումն ու դռների, լուսամուտների, մանրահատակի փոխարինումը:
«Հայաստան» համահայկական հիմնադրամի հասարակայնության հետ կապերի բաժնից «Առաջին լրատվական»-ին հայտնում են նորացվել են նաև էլեկտրական, ջրամատակարարման և կոյուղու համակարգերը: Վերանորոգման Ֆինանսավորումն իրականացրել է Հիմնադրամի Տորոնտոյի տեղական մարմինը:
Նորքի տուն ինտերնատը 1989-1990թթ. կառույց է: Առանձին վերանորոգման աշխատանքներն ուղղված են հաստատության համընդհանուր արդիականացմանը: Այսօր տուն-ինտերնատի 2 քառահարկ մասնաշենքերում բնակվում է 65-ից բարձր 230 տարեց, որից 130-ը` կին և 100-ը` տղամարդ: Տնօրեն Արթուր Մելքոնյանի փոխանցմամբ` վերջերս ամուսնացած երկու զույգերին սենյակներ են տրամադրվել վերանորոգված հարկաբաժիններում:
Տարեցների համար կազմակերպվում են ամենատարբեր միջոցառումներ: Մարտի 10-ին ինտերնատի շուրջ 60 բնակիչ Ա. Բաբաջանյանի համերգասրահում մասնակցել է Կարինե Մկրտչյանի «Կանայք չեն ծերանում» գրքի շնորհանդեսին, որը եզրափակվել է համերգային ծրագրով:
Իսկ փետրվար ամսին տնօրինության նախաձեռնությամբ կազմակերպվել է 78 տարեցների աչքերի անվճար ստուգում Հ. Մալայանի ակնաբուժության կենտրոնում: Արդյունքում տեսողության խնդիրներ ունեցող 49 տարեցներ օրերս կապահովվեն համապատասխան ակնոցներով:
Նորոգ հարկաբաժիններն ու տնօրինության միջոցներով վերանորոգված ճաշարանն ու ժամանցի սրահն առավել բարենպաստ պայմաններ են ստեղծել մեծահասակների բնակության և հանգստի համար:
