Թուրքիայի խորհրդարանի նախագահ Մեհմեդ Ալի Շահինը զգուշացրել է Կանադային, որ այդ երկիրը վերանայի իր քաղաքականությունը Հայոց ցեղասպանության հարցի վերաբերյալ և մինչև ապրիլ ամիսը նոր բանաձև չընդունի այդ կապակցությամբ:
Այս մասին հաղորդում է Huriyet օրաթերթը:
«Մեր ցանկությունն է նոր խնդիրներ չտեսնել մինչև ապրիլ ամիսը»,- ասել է Շահինը Կանադայի իր գործընկեր Նոել Քինսելայի հետ համատեղ մամուլի ասուլիսից հետո:
«1915 թ. դեպքերին պետք է գնահատական տրվի գիտականորեն և անաչառ: Հայաստանի և Թուրքիայի միջև ստորագրված արձանագրություններն այս նպատակն ունեն»,- ասել է Թուրքիայի խորհրդարանի նախագահը: Նա նաև զգուշացրել է, որ Կանադայում ապրում են Թուրքիայի ավելի քան 50,000 քաղաքացիներ, և ինքը չէր ցանկանա, որ Կանադայի կառավարությունն այնպիսի քայլեր ձեռնարկի, որոնք կվնասեն Թուրքիայի քաղաքացիներին:
Քինսելան իր հերթին ասել է, որ պատմությունից դասեր քաղելու անհրաժեշտություն է եղել, սակայն առանց որևէ մեկին վնաս հասցնելու նպատակադրումով:
«Տխուր դեպքը տեղի է ունեցել անցյալում, իսկ միջազգային հանրությունը կարող է ժամկետ ընտրել, թե երբ կանդրադառնա այս հարցին»,- եզրափակել է Քինսելլան՝ չմանրամասնելով, թե ինչ էր սրանով ցանկանում ասել:
Հիշեցնենք, որ 2004թ. Կանադայի խորհրդարանը ճանաչել էր Հայոց ցեղասպանությունը, ապա կառավարությունն էլ համապատասխան հայտարարություններ էր արել, որից հետո սրվել էին կանադա-թուրքական հարաբերությունները: Վերջին շրջանում երկու երկրների միջև հարաբերությունների բարելավում է նկատվում: