Իսրայելի Հայֆայի համալսարանի աերոդինամիկայի լաբորատորիայի գիտնականներն աշխատում են նոր ծրագրի վրա, որի նպատակն է ղեկավարել տարբեր տեսակի միջատների շարժը: Սրա վերջնական նպատակն է ճանճերին, ճպուռներին և բզեզեներին վերածել բիոռոբոտների, որոնք ի վիճակի կլինեն կատարել մարտական առաջադրանքներ:
Ինչպես հաղորդում է MIGnews գործակալությունը, այս հետազոտությունը, ԱՄՆ ռազմական լաբորատորիաներում իրականացվող փորձերի հետ, հնարավոր է միանգամայն նոր փուլ բացի ռազմական տեխնոլոգիաների զարգացման բնագավառում:
Նախագծի ղեկավարը՝ պրոֆեսոր Դանիել Վայհսը, որը վերջերս աշխատում էր Իսրայելի գիտության և տեխնոլոգիաների նախարարության գլխավոր տնօրենի պաշտոնում, բացատրում է. «Միջատների չափերով անօդաչու թռչող սարքեր ստեղծելու համար անհրաժեշտ են մոնիտորինգի և վերահսկման բարդ համակարգեր, ինչպես նաև թռիչքի համար անհրաժեշտ է էներգիայի աղբյուր»:
Վայհսը չի պատրաստվում բացահայտել իր հետազոտությունների մանրամասները և դրանց անցկացման նպատակը: Նա ասում է, որ ինքն էլ հստակ չգիտի՝ թե ինչպես դրանք կօգտագործեն զինվորականները:
Վայհսի աերոդինամիկ լաբորատորիան նման չէ աշխարհի ոչ մի այդպիսի հաստատության: Դրանում չկան ինքնաթիռի սարքավորումներ: Փոխարենը այն լի է ակվարիումներով և տարբեր միջատների տուփերով:
