Սիրիական ընդդիմության «Սիրիական ազատ բանակի» հրամանատարությունն այսօր հայտարարել է ապրիլի 10-ին ռազմական գործողությունները դադարեցնելու պատրաստակամության մասին` ինչպես պահանջվում է ՄԱԿ-ի հատուկ պատվիրակ Քոֆի Անանի ծրագըով: Reuters գործակալության հաղորդմամբ` «Ազատ Սիրիական բանակի» ներկայացուցիչ` գնդապետ Կասիմ Սաադ Ալ Դինն ընդգծել է, որ կրակի դադարեցման պայմանները կպահպանվեն, անգամ եթե Բաշար Ասադի զորքերը դուրս չբերվեն բնակավայրերից, այդ թվում` քաղաքներից, որտեղ տեղի են ունենում բախումներ:
«Մենք պատրաստ ենք պահպանել կրակի դադարեցման սահմանված ժամկետները, բայց եթե նրանք (կառավարական զորքերը) կրակեն, մենք զենք կվերցնենք ու կպայքարենք»,- ասել է գնդապետը:
Հիշեցնենք, որ ավելի վաղ «Սիրիական ազատ բանակի» հրամանատարությունը հրաժարվել էր գրավոր երաշխիք տալ կրակի դադարեցման վերաբերյալ:
Բացի դրանից` Քոֆի Անանը ավելի վաղ հայտարարել էր, որ խաղաղ բնակիչների դեմ ռազմական գործողությունների շարունակումը Սիրիայի կառավարոթւյան կողմից անընդունելի է. դրանով խախտվում են Սիրիայի կողմից ընդունված` հակամարտության կարգավորման ծրագրի պայմաները: Նա նաև կոչ է արել հակամարտության երկու կողմերին` մինչև ապրիլի 10-ը դադարեցնել ռազմական գործողությունները:
Հիշեցնենք, որ սիրիական իշխանությունները հայտարարել էին իրենց պատրաստակամության մասին` ապրիլի 10-ին միջազգային պատվիրակ Քոֆի Անանի խաղաղ ծրագիրն իրագործելու կապակցությամբ:
