Կանանց իրավունքների կենտրոնի իրավաբան Սաթինե Գևորգյանը «Առաջին լրատվական»-ի հետ զրույցում ասաց, որ ՀՀ-ում կանայք ենթարկվում են ֆիզիկական, հոգեբանական, ինչու չէ, նաև տնտեսական և սեռական բռնության:
Նա նշեց, որ իրենց դիմում են և՛ Երևանից, և՛ մարզերից. «Կանանց, որոնք ենթարկվել են բռնության, մենք տրամադրում ենք անվճար հոգեբանական և իրավաբանական խորհրդատվություն: Եթե միայն հեռախոսային զրույցը բավական չէ, կնոջը հրավիրում ենք նաև կենտրոն»:
Իրավաբանը նշեց, որ կենտրոնում տարվում է ինտենսիվ աշխատանք, որպեսզի վերացնեն բռնությունից առաջացած հոգեբանական խնդիրները. «Կնոջը հոգեպես օգնելուց հետո մեր իրավաբանները դիմում են դատարան՝ ալիմենտի և այլ հարցերով»:
Սաթինե Գևորգյանի խոսքերով՝ բռնության ենթարկված կանայք այժմ ավելի շատ են դիմում իրենց օգնությանը, որը կապված է ինչպես ավելի շատ տեղեկացված լինելու, այնպես էլ կանանց շրջանում վախի մթնոլորտի պակասելու հետ. «Իհարկե, շատ վատ է, երբ կինը ենթարկվում է ընտանեկան բռնության, որովհետև դրա արդյունքում շատ ընտանիքներ են կործանվում, սակայն դրական է այն քայլը, որ կանայք սկսել են բարձրաձայնել իրենց խնդիրները»:
