Լիբանանը ընդունել է շուրջ 20 հազար սիրիացի փախստականների, որոնք երկիրը լքել են չդադարող անկարգությունների հետևանքով: Այս մասին, ինչպես նշում է Interfax գործակալությունը, հայտարարել է ՄԱԿ-ի փախստականների հարցով գերագույն հանձնակատար Դանա Սուլեյմանը:
Համաձայն տեղեկությունների` 9408 փախստական են ներկայում գտնվում Լիբանանի հյուսիսի տարբեր շրջաններում: Եվս 2000-3000 մարդ Տրիպոլիում է` երկրի հյուսիսում: Բեկաա հովտում`Լիբանանի արևելքում, կան 1.5 հազար սիրիական ընտանիքներ, այսինքն` շուրջ 7.5 հազար մարդ: Մայրաքաղաք Բեյրութում ապաստան են գտել 704 փախստականներ:
Հիշեցնենք, որ այս շաբաթ ավելի քան 800-900 սիրիացի փախստականներ հատել են Թուրքիայի հետ սահմանը: Ներկայում Թուրքիայի տարածքում ապրում է շուրջ 21 հազար սիրիացի փախստական:
Սիրիայում շուրջ մեկ տարի է, ինչ չեն դադարում հակակառավարական ցույցերը, որոնք վերածվել են զինված բախման:
ՄԱԿ-ի տվյալներով`զինված կոնֆլիկտի հետևանքով սպանվածների թիվը հասել է 9000 մարդու:
