Ուկրաինայի Գլխավոր դատախազության քննիչները բոլոր հիմքերն ունեն փակելու երկրի նախկին նախագահ Վիկտոր Յանուկովիչի ենթադրյալ թունավորման հարցով քրեական գործը՝ հանցակարգի բացակայության պատճառով: Այս մասին, ինչպես հաղորդում է RIA Novosti-ն, հայտարարել է երկրի գլխավոր դատախազ Վիկտոր Պշոնկան:
2004թ. սեպտեմբերի սկզբին Ուկրաինայի նախագահական արշավի ժամանակ Յուշչենկոն առողջության հետ կապված խնդիրներ ունեցավ և տեղափոխվեց Ավստրիա, որտեղ մասնավոր հիվանդանոցներից մեկում հայտարարեցին, որ նա թունավորվել է դիոքսինով: Հետաքննության նախնական տվյալներով՝ Յուշչենկոյին փորձել էին թունավորել 2004թ. սեպտեմբերի 5-ին Ուկրաինայի անվտանգության ծառայության նախկին փոխղեկավար Վլադիմիր Սացյուկի ամառանոցում: Բժիշկները պնդում են, որ եթե դիոքսինը կլինիկական դրսևորումներ է ունեցել, աապ այդ քիմիական նյութը արյան մեջ կարելի է հայտնաբերել ամբողջ կյանքի ընթացքում: 2008թ. հունիսից մինչև 2010թ. իշխանափոխությունը Գլխավոր դատախազությունը բազմիցս հայտարարել է, որ Յուշչենկոյի կանխամտածված թունավորման փաստն ամբողջությամբ ապացուցված է: Սակայն Յանուկովիչի իշխանության գալուց հետո 2010թ. սկզբին քննչական խմբի կազմը փոխվեց: Նոր գլխավոր դատախազ Պշոնկան այժմ չի բացառում, որ Յուշչենկոյին ամենևին էլ չեն թունավորել:
«Քրեական գործի նյութերում առկա են բոլոր հանգամանքները գործը փակելու մասին ընթացակարգային որոշում ընդունելու համար»,- ասել է Պշոնկան մամուլի ասուլիսում:
Գլխավոր դատախազը նշել է, որ հետաքննությունը, այնուամենայնիվ, չի շտապում գործը փակել, քանի որ Յուշչենկոն մինչ այժմ արյուն չի հանձնել՝ դրանում դիոքսինի առկայութույնը ստուգելու համար:
