Թուրքական İhlas լրատվական գործակալության փոխանցմամբ՝ Շվեդիայի արտգործնախարար Կառլ Բիլդտն այսօր տեղի ունեցած մամուլի ասուլիսի ժամանակ անդրադարձել է Թուրքիայում լրագրողների ձերբակալության խնդրին.
«Մի քանի շաբաթ առաջ Թուրքիայի խորհրդարան ներկայացվեց Ergenekon-ի ու KCK-ի քրեական գործերի հետ կապված օրինագիծը: Թուրքիայում լրագրողներն ու պատգամավորները, որոնց անունները հրապարակեց մամուլը, ձերբակալված են իրենց մասնագիտական գործունեության և ոչ թե գործած հանցանքների համար:
Նրանց մի մասը մեղադրվում է պետական հեղաշրջման, իսկ մի մասն էլ՝ ահաբեկչության մեջ: Մենք ունենք մեր մոտեցումը տվյալ հարցում: Ամեն դեպքում, շարունակվում է Թուրքիայի կառավարության հետ երկխոսությունը»:
Հիշեցնենք, որ երկու օր առաջ ԵԱՀԿ ԶԼՄ-ների ազատության հարցերով ներկայացուցիչ Դունյա Միյատովիչը Թուրքիային կոչ արեց անհապաղ բարեփոխել ԶԼՄ-ների մասին օրենքը՝ ընդգծելով, որ ներկայիս դրությամբ՝ թուրքական բանտերում են գտնվում 95 լրագրողներ, մինչդեռ մեկ տարի առաջ այդ ցուցանիշը 57 էր: