Այսօր հրավիրած մամուլի ասուլիսի ժամանակ գեներալ-մայոր Արկադի Թադևոսյանը հայտարարեց, որ Աստանայի գագաթնաժողովից հետո պատերազմի վերսկսման հավանականությունը նվազել է: Նա հիշեցրեց, որ ԵԱՀԿ միջնորդները «կանաչ լույս» վառեցին պատերազմի վերսկսման համար` հայտարարելով, որ Լեռնային Ղարաբաղը գրավյալ տարածք է: Սակայն, ըստ Արկադի Թադևոսյանի, Աստանայից հետո ամեն ինչ փոխվեց: «Բոլոր պետությունները որոշեցին, որ բանակցությունները պետք է ընթանան խաղաղ պայմաններում: Այդ խաղաղ պայմանների մասին գրված է Աստանայի հռչակագրում»,- ասաց նա: Արկադի Տեր-Թադևոսյանը Ռուսաստանի քաղաքականությունը բնութագրեց ոչ հստակ և անկանխատեսելի: Հարցին, թե Ադրբեջանը չի՞ շարունակի իր ռազմատենչ հռետորաբանությունը, գեներալ-մայորը պատասխանեց. «Անպայման»: Նա կարծիք հայտնեց, որ այսօր Ռուսաստանն ու Չինաստանը խնդիրներ ունեն, և Չինաստանը դրանից հետ է քաշվում: Արկադի Տեր-Թադևոսյանը քանիցս շեշտեց, որ աշխարհաքաղաքական գործընթացները շարունակ փոփոխվում են, փոխվում են նաև շահերն ու հարաբերությունները: Այդ համատեքստում նա հիշատակեց, որ այսօր Իսրայելը բավականին լավ հարաբերությունների մեջ է Ադրբեջանի հետ: Ասուլիսի ժամանակ գեներալ-մայորը նշեց, որ պետք չէ մտածել, թե Ադրբեջանի սպառազինումը և ռազմական ծախսերի ավելացումն ուղղված են Հայաստանի դեմ, դրանք կարող են ուղղված լինել նաև այլ երկրի դեմ: Հասնելով մինչև ՆԱՏՕ-ի հետ հարաբերությունների պարզաբանում` Արկադի Տեր-Թադևոսյանը նշեց, որ Հայաստանի դեմ ՆԱՏՕ-ում ամենաշատը աշխատում է Անգլիան: Ի դեպ, Արկադի Տեր-Թադևոսյանը խոսում էր ռուսերեն` խախտելով «Լեզվի մասին» ՀՀ օրենքը: Լրագրողների խնդրանքին ի պատասխան, որ խոսի հայերեն, գեներալ-մայորը սկսեց խոսել կցկտուր ու անհասկանալի, ուստի նախընտրեցինք լսել նրա ռուսերեն խոսքը: