Թուրքիայի վարչապետ Ռեջեփ Թայիփ Էրդողանը միջազգային հանրությանը կոչ է արել անհապաղ միջոցառումներ կիրառել` ուղղված սիրիական ճգնաժամի կարգավորմանը:
Կիրակի օրը, ելույթ ունենալով Ստամբուլում «Սիրիայի բարեկամներ» խմբի երկրորդ համաժողովում, Էրդողանը հայտարարել է հարևան երկրում իրականացվող բռնությունների անհապաղ դադարեցման, Ալ-Ասադի վարչակարգի կողմից «Անանի ծրագրի» իրականացման, սիրիացի ժողովրդին հումանիտար օգնություն ցուցաբերելու անհրաժեշտության մասին:
«Չպետք է թույլ տալ, որ Ասադի վարչակարգն «Անանի ծրագիրը» կիրառի ժամանակ շահելու համար: ՄԱԿ-ի ԱԽ-ն պետք է կանգնեցնի Սիրիայի իշխող վարչակարգին»,- ընգծել է Էրդողանը:
Նա նշել է, որ Թուրքիան սիրիացի ժողովրդի կողմից է, սատարում է նրան և հույս ունի, որ ժողովուրդն «ինքը կարող է որոշել իր ճակատագիրը»:
Վարչապաետը նաև հայտնել է, որ սիրիացի փախստականների թիվը Թուրքիայում գերազանցում է 20 հազարը:
Համաժողովին, որը տեղի է ունենում ԱԳՆ նախարարների մակարդակով, մասնակցում են ավելի քան 80 երկրների և մի շարք միջազգային կազմակերպությունների ներկայացուցիչներ: Նշենք, որ Ռուսաստանը և Չինաստանը Ստամբուլի համաժողովին չեն մասնակացում:
Ակնկալվում է, որ Ստամբուլի համաժողովում Սիրիայի ազգային խորհուրդը կճանաչվի «սիրիացի ժողովրդի միակ ներկայացուցիչ», կստեղծվի միջազգային հիմնադրամ՝ Սիրիայի ժողովրդին օգնություն ցուցաբերելու համար, ինչպես նաև աջակցություն կհայտնվի Անանի նախագծի իրականացմանը` ուղղված սիրիական ճգնաժամի կարգավորմանը:
