Մեծ Բրիտանիայի թագուհու ամուսինը` Էդինբուրգի դուքս Ֆիլիպը, հերթական անգամ աչքի է ընկել իր յուրօրինակ հումորով, երբ հարցրել է հաշմանդամին, թե քանի մարդու է նա վրաերթի ենթարկել իր սայլակով: Այս մասին հաղորդում է The Daily Telegraph-ը:
90–ամյա դուքսը՝ թագուհու հետ, վերջինիս կառավարման 60 ամյակին նվիրված միջոցառումների շրջանակներում Լոնդոնում կատարած շրջագայության ժամանակ ապացուցել է, որ առողջության հետ ունեցած խնդիրները չեն խլացրել նրա հումորի զգացումը:
Կատակի թիրախ է դարձել 60–ամյա Դեյվիդ Միլլերը` Ռեդբրիջում Վալենթայն դղյակի կառավարիչը, ով հայտնել է, որ չի վիրավորվել արքայազն Ֆիլիպի կատակից:
«Դա բնորոշ է դքսին: Նա հայտնի է իր հումորներով, բայց ոչ մի ահավոր բան տեղի չի ունեցել, այդ ամենը բարի կատակի շրջանակներում էր: Ես նրան ուղղակի պատասխանել եմ` ո՛չ, Ձերդ թագավորական մեծություն, ես ոչ մեկին վրաերթի չեմ ենթարկել»,- պատմել է Միլլերը:
Թագավորական ընտանիքն այս այցելությունների շրջանակում առաջինը մեկնել է Ռեդբրիջ: Թագուհու ժամանելու պահին այնտեղ արդեն հավաքված է եղել մի քանի հազար մարդ, որոնք աղմուկով դիմավորել են Եղիսաբեթ 2-րդին: Մինչ դղյակ հասնելը թագուհին և Էդինբուրգի դուքսը զրուցել են մի քանի ներկաների հետ:
Թագուհին և դուքսը այցելել են ամրոցում ներկայացված ցուցահանդես:
Այս շրջանի բնակիչներն իրնեց հարգանքը հայտնելով թագուհուն` տները զարդարել են բրիտանական դրոշներով և միապետի նկարներով:
Պատկառելի տարիքի պատճառով ամուսինները հրաժարվել են արտասահմանյան ուղևորություններից, դրա փոխարեն նախընտրել են շրջագայություն ամբողջ Միացյալ Թագավորությունով, որը կավարտվի մայիսի 15-ին:
Բրիտանական լրագրողները բնական են համարում Ֆիլիպի հումորի նման արտահայտությունը, որովհետև նա 60 տարի առանց խախտման հետևել է միապետից երկու քայլ հետ օրենքին:
Թերթերը հիանում են նրանով, որովհետև նա, ի տարբերություն մյուս քաղաքական գործիչների, երբեք ներողություն չի խնդրել իր ասածների համար, եթե դրանք ինչ-որ մեկին վիրավորել կամ վեճերի առիթ են դարձել:
«Ֆիլիպը, մահացող տեսակի վերջին ներկայացուցիչներից է, որոնք ոչնչից չեն բողոքում, այլ բոլորի հետ մերվում են»,- գրում են թերթերը:
Ֆիլիպի ձգտումը թեթևացնել թեժացած իրավիճակը, և նրա յուրօրինակ հումորի զգացումը վաղուց հայտնի են բրիտանացիներին: Տեղի լրատվամիջոցները դրանք անվանում են «անտեղի արարքներ»:
Նրա նման արտահայտությունները տպավորություն են ստեղծել, որ նա սուր լեզու ունի և իր համար միևնույն է, թե իր մասին ինչ են խոսում: Նույնիսկ ամենամոտ բարեկամներն են դառնում նրա հումորների զոհը: Մի անգամ իր դստեր` արքայադուստր Աննայի մասին, որը շատ է սիրում ձիեր, նա ասել է. «Եթե դա խոտ չի ուտում, ուրեմն Աննային չի հետաքրքրում»:
