Ցորենի, թռչնի և խոզի մսի ինքնաբավության մակարդակը Հայաստանում շարունակում է ցածր մնալ. 2006-2010թթ. միջին տվյալներով՝ ցորենինը՝ 35.3%,
հատիկաընդեղեն մշակաբույսերինը` 51.8%, թռչնի մսինը` 18.4% և խոզի մսինը` 46.3 %. այսօր «ՀՀ գյուղատնտեսության զարգացման խնդիրները պարենային անվտանգության համատեքստում» թեմայով խորհրդաժողովի ժամանակ ասաց գյուղնախարար Սերգո Կարապետյանը:
Նախարարը կարևորեց «ՀՀ պարենային անվտանգության հայեցակարգի» մշակումը, ըստ որի՝ պարենային անվտանգության ապահովման համար նախանշված են 8 ուղղություններ՝ ագրոպարենային համակարգի զարգացում, սննդամթերքի ինքնաբավության, անվտանգության և որակի, մատչելիության ապահովում, ռեսուրսների արդյունավետ կառավարում և այլն: Հայեցակարգի 2012-2014թթ. միջոցառումների ծրագրում ներառված են 16 ուղղություններ՝ 67 միջոցառումներով:
Հայեցակարգը մշակվել է Ազգային անվտանգության խորհրդում, և ըստ ԱԱԽՔ Արթուր Բաղդասարյանի՝ պարենային ապահովման հիմնախնդիրը գերակա նշանակություն ունի ՀՀ-ում, նաև ԱՊՀ մյուս երկրներում: «ՀՀ-ն կատարել է շատ կարևոր քայլ՝ կարողացանք մշակել հայեցակարգը»,- ասաց ԱԱԽՔ Ա. Բաղդասարյանը՝ նշելով, որ դրանով խիստ իրատեսական խնդիրներ են դրվել, և խնդիրը պետք է սրել հասարակության մեջ:
