Թունիսում իշխանության եկած չափավոր իսլամիստական «Նահդա» կուսակցությունը հայտարարել է, որ շարիաթական իրավունքի նորմերը չեն դրվի երկրի նոր սահմանադրության հիմքում: Այս մասին ասել է կուսակցության ներկայացուցիչ Ամեր Լարայեդը:
Ինչպես հաղորդում է BBC-ն, նրա խոսքերով՝ սահմանադրությունը կլինի ընդհանուր առմամբ աշխարհիկ՝ «հանրության միասնությունը պահպանելու և նրա մեջ տարաձայնություններ չսերմանելու համար»: Փաստաթղթում իսլամը կնշվի որպես պետական կրոն, սակայն դրանում շարիաթին հատուկ հղումներ չեն արվի:
Սակայն Թունիսում գործող ծայրահեղական իսլամիստական կուսակցությունները պահանջում են նոր պահպանողական կարգուկանոն սահմանել: Նրանք մասնավորապես պնդում են, որ կանայք պարտադիր կերպով պետք է հիջաբ կրեն, պետք է ամբողջությամբ արգելվի ալկոհոլը, բանկային տոկոսադրույքները և այլն:
Իսլամիստներին հակադրվում են սեկուլյարիստները, որոնք ցանկանում են երկիրն առաջ տանել արևմտյան օրինակով: Այն բանից, թե ինչ դիրքորոշում կորդեգիր «Նահդան», մեծ հաշվով կախված է այս պահին մշակվող սահմանադրության հետագա տեսքը: Սահմանադրական ժողովում այս կուսակցությունն ունի ձայների 40%-ը:
Սահմանադրության նախագիծը կարող է հավանություն ստանալ այդ ժողովի կողմից, եթե դրան կողմ քվեարկի պատվիրակների ճնշող մեծամասնությունը: Հակառակ դեպքում փաստաթուղթը կներկայացվի համաժողովրդական հանրաքվեի:
