Ադրբեջանական Trend լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլին ելույթ է ունեցել Սեուլում կայացող միջուկային անվտանգության գագաթնաժողովում: Իր 5 րոպեանոց ելույթում Սաակաշվիլին խոսել է «սև անցքերից», որոնց տակ նա նկատի է առել Ռուսաստանի կողմից օկուպացված Աբխազիան ու Հարավային Օսիան.
«Մեր երկիրը կատարել է ստանձնած բոլոր պարտավորությունները, սակայն մեր չվերահսկվող տարածքներում առկա է միջուկային նյութերի տարածման վտանգ: Մենք որևէ տեղեկություն չունենք օկուպացված այդ տարածքների մասին, որտեղից լիովին իրատեսական է այդպիսի նյութերի տարածումը, քանի որ այդ տարածքներն արդեն իսկ ծառայում են՝ որպես թմրանյութերի փոխադրման երթուղի: Դրա համար էլ չի բացառվում, որ դրանք ծառայեն որպես միջուկային նյութերի տարածման վայր:
Թբիլիսիի կողմից վերահսկվող տարածքներում մենք կատարում ենք մեր բոլոր պարտավորությունները, ինչը խոստովանել է նաև նախագահ Բարաք Օբաման: Բացի այդ, Վրաստանն իր օրենսդրությունը համապատասխանեցրել է միջազգային նորմերին: Մինչդեռ Աբխազիայի տարածքում՝ Սուխումից 10 կիլոմետր հեռավորության վրա ընկած Ագուձեր ավանում, գտնվում է միջուկային հետազոտություններին առնչվող օբյեկտ»:
