Քիչ առաջ Սեուլում սկսվել է ԱՄՆ և Ռուսաստանի նախագահներ Բարաք Օբամայի և Դմիտրի Մեդվեդևի հանդիպումը, որի ժամանակ քննարկվելու են մի շարք հարցեր, այդ թվում` Սիրիայի, Եվրոպայում հակաօդային պաշտպանության ամերիկյան համակարգերի տեղակայման և երկկողմ հարաբերությունների այլ խնդիրներ: Այս մասին հաղորդում է RIA-Novosti գործակալությունը:
Հանդիպմանը ներկա են երկու երկրների մի շարք բարձրաստիճան պաշտոնյաներ, այդ թվում` ՌԴ արտգործնախարար Սերգեյ Լավրովը, ԱՄՆ նախագահի անվտանգության հարցերով օգնական Թոմ Դոնիլոնը, ԱՄՆ էներգետիկայի նախարար Սթիվեն Չուն, ԱՄՆ փոխպետքարտուղար Բիլ Բըրնսը և այլն:
Ավելի վաղ ՌԴ նախագահի օգնական Սերգեյ Պրիխոդկոն ասել է, որ չնայած ԱՄՆ-ի և Ռուսաստանի միջև նախկինում ունեցած հաջողություններին, այդուհանդերձ բազմաթիվ չլուծված հարցեր են մնում: Մասնավորապես խոսքը վերաբերում է ԱՄՆ կողմից հակահրթիռային համակարգերի տեղակայմանը: Ռուսաստանն ԱՄՆ-ից պահանջում է հստակեցնել դրանց աշխարհագրական դիրքը և տեխնիկական երաշխիքներ տրամադրել, որ դրանք չեն ուղղվի Ռուսաստանի դեմ:
