Նիգերիայում ռազմական գործողության ժամանակ պայթյունի հետևանքով մահացել է երկու մարդ: Եվս երկու մարդ վիրավորվել է:
Պայթյունը տեղի է ունեցել Կանո քաղաքում, որտեղ բանակը գործողություններ էր իրականացնում ծայրահեղ իսլամիստական «Բոկո Հարամ» խմբավորման դեմ: Գրոհայինները պայթեցրել են ականապատ մեքենա:
Զինվորականները հայտարարել են, որ իրենց հաջողվել է ձերբակալել խմբավորման հետ անմիջական կապ ունեցող 12 մարդու։
Հիշեցնենք, որ մարտի 13-ին Նիգերիայի հյուսիսում` Մուբիա քաղաքում գրոհայինները հարձակվել էին ռազմական ոստիկանության պահակախմբի վրա` սպանելով առնվազն 5 մարդու:
Նշենք, որ «Բոկո Հարամ» խմբավորումը ձևավորվել է մոտ տասը տարի առաջ՝ Մաիդուգուրիում: Վերջին ամիսների ընթացքում խմբավորումը մի շարք ահաբեկչություններ է իրականացրել Նիգերիայում` պահանջելով շարիաթի օրենքների շուտափույթ հաստատում:
