«Ընտրակաշառքի գինը հասել է 25-30 հազարի»,- այսօր լրագրողների հետ հանդիպմանը տեղեկացրեց «Ազատ դեմոկրատներ» կուսակցության վարչության անդամ Արմեն Առաքելյանը՝ խոսելով Հայաստանում ներքաղաքական իրավիճակի և նախընտրական զարգացումների շուրջ:
Անդրադառնալով իշխանության՝ արդար ընտրություններ անցկացնելու խոստումներին՝ նա ասաց. Միամիտ չենք, որ հավատանք, թե արդար ընտրություններ են լինելու»:
Ըստ Ա. Առաքելյանի՝ ընտրակաշառքը քողարկված ձևերով խեղդել է հանրապետությունը։ «Եթե ամեն հարց լուծվեր գումարի և իշխանության շնորհիվ, չէինք մասնակցի ընտրություններին. դրանք որոշակի սահմաններում են գործում»,- նշեց Ա. Առաքելյանը՝ հավելելով, որ իշխանություններն այլևս
չեն կարող վայրագ մեթոդներ կիրառել, քանի որ դրա ռեսուրսն էլ է ավարտվել:
Նրա խոսքով՝ առաջիկա խորհրդարանական ընտրությունները կարող են նման լինել Հրազդանի քաղաքապետի ընտրություններին. նախապես բոլոր հարցերը՝ լուծված, գումարները՝ բաժանված, որի դեմը կարող է առնել միայն պետությունը: Այս ամենին զուգահեռ, Արմեն Առաքելյանի կարծիքով, կան նաև շատ անկաշառ մարդիկ, որոնց հնարավոր չէ գնել:
«Ազատ դեմոկրատներ» կուսակցության վարչության անդամը ցավով նշեց, որ ԱԺ-ում ներկայացված է ընդդիմադիր շատ փոքր մաս, իսկ այսօր փողոցում 70-60%-ն ընդդիմադիր է: Ըստ նրա՝ խնդիրն այն է, որ ընդդիմությունը չի կենտրոնացվում մեկ տեղ, այլ տարրալուծվում է:
Ըստ բանախոսի՝ «Ազատ դեմոկրատներ» կուսակցությանը հոգեհարազատ են «Հանրապետության» և Պետրոս Մակեյանի ղեկավարած «Ժողովրդավարական հայրենիք» կուսակցության գաղափարները:
