Ռուսական ВЗГЛЯД թերթի փոխանցմամբ՝ Վրաստանի փոխվարչապետ, եվրոպական և եվրատլանտյան կառույցներին Վրաստանի ինտեգրման հարցերով պետնախարար Գեորգի Բարամիձեն Թբիլիսիում տեղի ունեցած «Արևելյան գործընկերության» առաջին ֆորումում հայտարարել է, որ Ռուսաստանի հետ հակամարտությունը հանդիսանում է Վրաստանի զարգացման գլխավոր խոչընդոտը.
«Տխուր իրողություն է, որ Ռուսաստանն օկուպացրել է Վրաստանի տարածքի 20 տոկոսը, որ Ռուսաստանը չի կատարում ստանձնած միջազգային պարտավորությունները, որ զինված ուժերի օգնությամբ ուժեղացնում է էթնիկ մաքրումները:
Մենք ցանկանում ենք տեսնել ժողովրդավարական, կայուն, պատասխանատու Ռուսաստան, սակայն, դժբախտաբար, դժվար է դա պատկերացնել նրա ներկայիս իշխանությունների պայմաններում: Վրաստանը միակողմանիորեն ստանձնել է հակամարտության խաղաղ ճանապարհով կարգավորումը, սակայն Ռուսաստանը դա չի արել:
Չնայած դրան՝ Վրաստանը երբեք չի գործի ռուս ժողովրդի դեմ ուղղված քայլեր: Մենք կփորձենք լինել առավելագույնս կառուցողական: Օրինակ՝ ոչ վաղ անցյալում մենք չեղյալ հայտարարեցինք Ռուսաստանի քաղաքացիների համար գործող անցագրային ռեժիմը:
Մենք մեր տարածքում ողջունում ենք ռուս զբոսաշրջիկներին և ոչ թե տանկերին: Միջազգային հանրությունը պետք է ներազդի Ռուսաստանի վրա՝ Աբխազիայի ու Հարավային Օսիայի օկուպացիան վերջ դնելու համար»:
