Ամբողջ աշխարհում նախատեսվում են համաշխարհային տաքացման հետ կապված միջոցառումներ: Ինչպես հաղորդում է Վրաստանի Օդերևութաբանական փոփոխությունների կառավարման վարչության ղեկավար Գրիգորի Լազարիևը, ստեղծվել է «Կանաչ կլիմայի ֆոնդ», որի գլխավոր ուղղություններից մեկը համաշխարհային տաքացման ազդեցության նվազեցումն է:
«Աշխարհի զարգացած երկրները 2013 թվականից սկսելու են ավելի թույլ երկրների առաջ ծառացած խնդիրների լուծման նպատակով տարեկան 100 մլրդ դոլար տրամադրել: Այդ ընթացքում արդեն ծրագիրը որոշակի ձևաչափեր կստանա: Համաշխարհային տաքացման դեմ ուղղված միջոցառումները թանկ կարժենան երկրների համար: Վերջին ժամանակներս փոխվել է տեղումների բնույթը, բարձրացել է ծովի մակերեսը: Անհրաժեշտ է գետերի ափերին պաշտպանիչ ամրություններ կառուցել»,- նշել է փորձագետը:
Նրա խոսքերով՝ համաշխարհային տաքացման հետևանքների վտանգի առաջ կանգնած է նաև Վրաստանը, և վատ չէր լինի, եթե նա էլ ընդգրկվեր այդ ծրագրերի մեջ:
Նշենք, որ համաշխարհային տաքացումն առաջ է եկել մարդու կողմից բնության վրա թողած բացասական ազդեցության հետևանքով: Մարդը կարող է թուլացնել այս երևույթի ազդեցությունը: Դրա համար անհրաժեշտ է տնտեսել էլեկտրաէներգիայի և վառելիքի ծախսը, զարգացնել ջրածնային էներգետիկան և ծառեր տնկել: