Երկրի կառավարության` 2010 թվականի արդյունքներին նվիրված նիստում ուրբաթ օրը Ադրբեջանի նախագահ Իլհամ Ալիևը պնդել է, թե հայկական կողմը «փորձում է վերադառնալ ավելի վաղ բանակցությունների սեղանի շուրջ համաձայնեցված հարցերին, փորձում է ժամանակ ձգձգել». Հաղորդում է «Ազատություն» ռադիոկայանը: «Մի խոսքով, մեզ մոտ տպավորություն է ստեղծվում, որ Հայաստանը չի ցանկանում ազատել զավթած տարածքները, ձգտում է հնարավորինս երկար օկուպացված պահել այդ հողերը: Եվ այդպիսով, դա օգտագործելով` Ադրբեջանից ստանալ Լեռնային Ղարաբաղի կարգավիճակի հետ կապված իրենց ձեռնտու պայմաններ: Իսկ դա անհնար է», – հայտարարել է Ալիևը` կրկնելով բազմիցս արած այն պնդումը, թե «Ղարաբաղը բուն ադրբեջանական հող է»:
«Ադրբեջանական պետությունը երբեք թույլ չի տա, որպեսզի կրկին երկրորդ հայկական պետություն ստեղծվի Ադրբեջանի պատմական հողերի վրա: Այսինքն, դա չի եղել, չի և երբեք չի լինի բանակցությունների թեմա: Հարցի լուծման համար Հայաստանը պետք է դուրս բերի իր օկուպացիոն զորքերը զավթած հողերից: Դրանից հետո կարող է հաստատվել խաղաղություն», – ասել է Ադրբեջանի նախագահը և հավելել. – «Ադրբեջանի քաղաքացիները պետք է վերադառնան իրենց հայրենի հողերը, այդ թվում Լեռնային Ղարաբաղ, պետք է ապրեն Լեռնային Ղարաբաղում ինքնավարության պայմաններում: Ինչպես և բոլոր քաղաքակիրթ երկրներում, այնտեղ նույնպես աշխատանքը պետք է կազմակերպվի ժողովրդավարական բոլոր սկզբունքների հիման վրա: Այդ շրջանակներից դուրս, որևէ այլ ուղղությամբ հարցի լուծումը անհնար է: Ադրբեջանը չի համաձայնի դրան»:
«Մենք պետք է ձգտենք 2011 թվականին ավելի ամրապնդել մեր դիրքերը», – հայտարարել է Ալիևը` վստահեցնելով, որ անցած տարի միջազգային կազմակերպություններում «շատ կարևոր իրադարձություններ են տեղի ունեցել տվյալ հարցով». – «Եվրախորհրդարանը ընդունեց շատ արդարացի բանաձև Լեռնային Ղարաբաղի հակամարտության վերաբերյալ: Տվյալ հարցը քննարկվում է նաև միջազգային այլ կազմակերպություններում, և մեր դիրքորոշումը պաշտպանվում է: ՆԱՏՕ-ի գագաթնաժողովում այդ հարցով ընդունվեց շատ արժեքավոր, արդարացի բանաձև, որը սատարում է Ադրբեջանի տարածքային ամբողջականությունը: Երեկ Եվրահանձնաժողովի նախագահ պարոն Բառոզուի հետ համատեղ ասուլիսում արտահայտվեց Եվրահանձնաժողովի և Եվրոպական միության դիրքորոշումը տվյալ հարցով, այն է` Եվրոպական միությունը սատարում է Ադրբեջանի տարածքային ամբողջականությունը»:
«Այսինքն, սրանք են հարցի լուծման միջազգային շրջանակները, և այն կարող է լուծվել միայն այդ շրջանակներում: Որևէ այլ տարբերակ քննարկման թեմա չէ», – ասել է Ադրբեջանի նախագահը: – «Ես կարծում եմ, որ բանակցային գործընթացում Ադրբեջանը կառուցողական դիրքորոշում է ցուցաբերում: Մենք ձգտում ենք հարցը լուծել խաղաղ ճանապարհով: Բայց այստեղ հիմնական դերը խաղում են միջազգային իրավունքի նորմերը: Ադրբեջանի տարածքային ամբողջականության վերականգնումը պետք է անվերապահ կերպով գտնի իր լուծումը»:
«Մյուս կողմից, և դա ոչ ոքի համար գաղտնիք չէ, բանակցություններին զուգընթաց` մենք միաժամանակ մեծ ուշադրություն ենք դարձնում բանակաշինությանը, հզորացնում ենք մեր բանակը: Թշնամին ևս դա գիտի և դողում է ահից: Նրանք նույնպես լավ գիտեն, որ ադրբեջանական բանակը ի վիճակի է ցանկացած պահի կործանարար հարված հասցնել թշնամուն: Եվ այդ հարվածի արդյունքում իրավիճակը ոչ միայն Լեռնային Ղարաբաղում, այլև Հայաստանում կարող է զարգանալ լրիվ այլ ուղղությամբ: Ուղղակի մենք ցանկանում ենք, որպեսզի այդ հարցը լուծվի խաղաղ ճանապարհով: Սակայն մենք մեզ շատ վստահ ենք զգում», – հայտարարել է Ալիևը. հաղորդում է «Ազատություն» ռադիոկայանը:
