Կլսի՞ Կ. Կարապետյանը Յովանովիչին

Հայաստանում ԱՄՆ դեսպան Մարի Յովանովիչը Երևանի քաղաքապետ Կարեն Կարապետյանի հետ ուրբաթ կայացած հանդիպման ժամանակ կարևորել է «Ժողովներ, հանրահավաքներ, երթեր և ցույցեր անցկացնելու մասին» ՀՀ օրենքը և օրենքի պահանջների պահպանումը: Իրավապաշտպան Վարդան Հարությունյանը «Առաջին լրատվականի» հետ զրույցում նկատեց, որ մարդու իրավունքներն այն բնագավառն է, որ ցանկացած պետություն կարող է միջամտել մեկ այլ պետության տարածքում եղած միջադեպերին, և դա չի դիտարկվում որպես ուրիշի գործերին խառնվել. «Մարդու իրավունքների կարևորագույն տարրերից մեկն է ազատ արտահայտվելը, հանրահավաքներ անելը, այդ իմաստով աշխարհի ցանկացած ժողովրդավարական երկիր ոչ միայն կարող է, այլ պետք է և պարտավոր է միջամտել, որպեսզի Հայաստանի կարգի երկրներում չխոչընդոտվեն հանրահավաքներ անցկացնելու մարդկանց իրավունքները»: Իրավապաշտպանի գնահատմամբ, ԱՄՆ դեսպանի արձագանքը և միջամտությունը բավականին ուշացած է. «Նրանք պիտի ոչ միայն ցանկություն հայտնեն, այլև պահանջեն Հայաստանի Հանրապետությունից, որպեսզի նրանք հարգեն միջազգային պարտավորությունները և մարդու իրավունքները»:
Հարցին, թե Յովանովիչի կոչը քաղաքապետարանին ի՞նչ ազդեցություն կունենա ընդդիմության հետագա հանրահավաքները արտոնելու վրա, Հարությունյանը պատասխանեց. «Նորմալ մարդիկ և նորմալ պետությունները պետք է իրենց պահանջները իրականացնեն, թե ինչ կանեն աննորմալ մարդիկ և աննորմալ պետությունները, դա արդեն այլ խնիր է: Ես չեմ կարծում, որ մեկ հանդիպումից և մեկ պահանջից հետո Հայաստանի իշխանությունները ձեռքերը վեր կբարձրացնեն և թույլ կտան, որ մարդիկ ցույցեր, հավաքներ և երթեր կազմակերպեն: Բայց կարծում եմ, որ Ամերիկայի պես դեմոկրատական երկրները պարտավոր են իրենց խոսքն ասելու, անկախ նրանից, թե Սերժ Սարգսյանը, Լուկաշենկոն, Այաթոլլահ Խամենեին, թե մեկ ուրիշ մեծ կամ փոքր բռնակալ կկատարի նրանց պահանջը, թե ոչ»: