«Առաջին լրատվական»-ն արդեն տեղեկացրել է, որ այսօր «Ժառանգություն» կուսակցության խորհրդի նիստում քննարկվել և որոշում է կայացվել մասնակցել 2012թ.-ի մայիսի 6-ի խորհրդարանական ընտրություններին: Ձայների մեծամասնությամբ հաստատվել է կուսակցության կողմից առաջադրվող մեծամասնական թեկնածուների ցանկը:
Կուսակցության տարածած հաղորդագրությունից տեղեկանում ենք, որ «Ժառանգությունը», հաշվի առնելով «Ազատ դեմոկրատներ» կուսակցության հետ բանակցությունների ընթացքում ձեռք բերված համաձայնությունը` հաստատել է նաև համամասնական ընտրակարգով այդ կուսակցության, քաղաքացիական հասարակության ներկայացուցիչների և «Ժառանգություն» կուսակցության համատեղ ցուցակը:
Բոլոր կանխատեսումներն ու խոստումները, թե «Ժառանգությունն» ու «Ազատ դեմոկրատները» նախընտրական դաշինքով կմասնակցեն ԱԺ ընտրություններին չիրականացան: Այժմ «Ազատ դեմոկրատներ» կուսակցության շարքերում լուրջ դժգոհություն է հասունացել, առ այն, որ «Ազատ դեմոկրատները» «Ժառանգությանը» զիջել են ոչ միայն համամասնական ցուցակի առաջին տեղը, այլև դաշինքով ընտրություններում մասնակցելու նախապես ձեռք բերված համաձայնությունը:
«Առաջին լրատվական»-ին հայտնի է դարձել, որ այսօր ուշ երեկոյան նշանակված է «Ազատ դեմոկրատներ» կուսակցության վարչության ժողով, որտեղ կուսակցության վարչությունը բացատրություն է ակնկալում ստանալ կուսակցության նախագահ Խաչատուր Քոքոբելյանից:
