«Ճիշտ է Ադրբեջանը ներկայացրել է իր ռազմական բյուջեն, որ 3,1մլրդ է կազմում, որից հնարավորություն ունեն տարեկան ծախսել ընդամենը 600-ից 1 մլրդ դոլար: Սակայն այստեղ այլ հարց է, թե այդ գումարներն իրականում ինչպես են ծախսվում և ինչ տեխնիկայի է ձեռք բերվում»,- «Առաջին լրատվականի» հետ զրույցում նշեց թուրքագետ, քաղաքական հետազոտությունների ինստիտուտի ավագ փորձագետ Լևոն Հովսեփյանը:
Փորձագետը վստահեցրեց, որ Ադրբեջանի կողմից այնպիսի տեխնիկա է ձեռք բերվել, որ դժվար թե մեզ համար լուրջ սպառնալիքներ ներկայացնի. «Ադրբեջանը զուտ օդային միավորների թվաքանակով գերազանցում է Հայաստանին, սակայն դա էական առավելություն չի տա Ադրբեջանին, քանի որ օդուժն այնպիսի տեխնիկա չունի, որ լուրջ հարցեր լուծի և ընդհանրապես նրանք այնպիսի տեխնիկա չունեն, որը կարող է սպառանիլք ներկայացնել: Եթե Ադրբեջանում պարբերաբար ձեռք է բերում ռազմական տեխնիկա, սպառազինություն, դրանից չպետք է վախենալ, այլ պետք է պատրաստ լինել: Մեր կողմից էլ ձեռնարկվում են համարժեք քայլեր, կարծում եմ, որ նորմալ ռեսուրսների ներդրման պարագայում մենք նույնպես կարող ենք զարգացնել ռազմարդյունաբերության ոլորտը և կարող ենք ավելի շուտ հաջողությունների հասնել` հաշվի առնելով մեր գիտատեխնիկական հնարավորությունները: Բավականին մեծ գումարներ են ներդրվում Ադրբեջանում ռազմարդյունաբերության սեփական համալիրը զարգացնելու համար, այսինքն` փորձ է արվում ստեղծել սեփական ռազմաարդյունաբերություն»: