Ֆրանսիացի զինվորներին արգելել են համազգեստով քայլել փողոցներում այն բանից հետո, երբ մի քանի օր առաջ սպանվեցին երեք զինվորականներ: Բացի այդ, զինվորական ստորաբաժանումների մուտքը պահպանվելու է խիստ գրաֆիկով:
Առաջին պատահարը եղել է կիրակի օրը` մարտի 12-ին, Տուլուզում: Անհայտ անձը գնդակահարել էր 1-ին պարաշյուտային ստորաբաժանման սերժանտի, ում մարմինը հայտնաբերվել էր հենց իր մոտոցիկլետի կողքին: Մահվան պահին նա ծառայության մեջ չէր:
Մի քանի օր անց` մարտի 15-ին, Մոնտոբանում գնդակահարվել էին 17-րդ պարաշյուտային ստորաբաժանման ևս երկու սերժանտներ: Սպանության վայրում հայտնաբերվել են նույն տրամաչափի փամփուշտներ, ինչ որ առաջին սպանության ժամանակ:
Երկու դեպքերում էլ կրակողը, որին հաջողվել է փախչել, սկուտերով է եղել:
Ինչպես հաղորդում է Ֆրանսիայի ներքին գործերի նախարար Քլոդ Գեանը, սպանության դրդապատճառը հայտնի չէ: Հետաքննությամբ զբաղվում է ոչ միայն ոստիկանությունը, այլև ահաբեկչության դեմ պայքարող հատուկ ստորաբաժանումը։
