«Ժողովրդավարությունը սկսվում է քեզնից» ծրագիրն այս տարի առաջին անգամ սկսեց իր գործունեությունը ծավալել նաև Հայաստանում: Մեր երկրում այդ ծրագիրն իրականացնում է Քաղաքական դասընթացների երևանյան դպրոցը: Ծրագրի շրջանակում ընտրվել է 20 դպրոց, որոնցից 16-ը` Հայաստանի մարզերից, 4-ը` Երևանից: Յուրաքանչյուր դպրոց պետք է ընտրի մեկ պատվիրակ: Նույն համամասնությամբ պատվիրակներ ընտրվելու են Վրաստանից և Ադրբեջանից, իսկ հաջորդ ընտրությունները տեղի են ունենալու Վրաստանում, որտեղ յուրաքանչյուր երկրի 20 պատվիրակից կընտրվեն 5-ը, ովքեր գնալու են Բրյուսել` Եվրոպական միություն: Պատվիրակներն ընտրվում են ժողովրդավարության հասկացության վերաբերյալ ընթացող քառօրյա սիմուլյացիոն խաղերի հետևանքով: Չորս օրերի ընթացքում աշակերտները շփվում են կուսակցությունների, լրատվամիջոցների, պետական կառույցների ներկայացուցիչների հետ: Քաղաքական դասընթացների երևանյան դպրոցի հիմնադիր-տնօրեն Արմեն Զաքարյանը նշեց, որ այս ծրագիրն աշակերտներին հնարավորություն է տալիս, որպեսզի իրենք` որպես քաղաքացիներ, պատկերացում կազմեն քաղաքական համակարգերի մասին, թե ինչպես են աշխատում քաղաքական համակարգերը, որպեսզի ժողովրդավարությունն առավելագույնս դրսևորվի: Զաքարյանը նաև նշեց, որ ծրագրի ավարտին ընտրված 15 պատվիրակները կհետևեն Եվրոպական միության աշխատանքներին և կտեսնեն,թե ինչպես է գործում ժողովրդավարությունն այնտեղ. «Աշակերտները հնարավորություն կունենան ոչ միայն ազգային-տարածաշրջանային, այլ նաև եվրոպական մակարդակում հաղորդակցվելու ժողովրդավարության հետ»:
Ի դեպ, «Քվանտ» վարժարանն այսօր արդեն ընտրեց հայաստանյան պատվիրակության առաջին պատվիրակին` «Քվանտի» 11-րդ դասարանի աշակերտ Նորայրին:
