Սաուդյան Արաբիան չի կարող փոխհատուցել համաշխարհային շուկայում նավթի հնարավոր դեֆիցիտը՝ Իրանի դեմ պատժամիջոցների խստացման դեպքում: Այսպիսի հայտարարությամբ, ինչպես հաղորդում է Al-Jazeera-ն, հանդես է եկել երկրի նավթի նախարար Ալի Ալ-Նաիմին:
«Այն բոլոր հայտարարությունները, թե Սաուդյան Արաբիան կավելացնի նավթի մատակարարումները՝ Իրանի մատակարարումները փոխհատուցելու համար, ճիշտ չեն»,- ասել է նախարարը:
Ալ-Նաիմի խոսքերով՝ Սաուդյան Արաբիան չի կարող լրացնել նավթի դեֆիցիտը և այդպիսի նպատակներ չի հետապնդում:
Ավելի վաղ Սաուդյան Արաբիան հայտարարել էր, որ փետրվարին ավելացրել է նավթի արտահանումը մինչև 9 մլն բարել՝ հունվարի վերջի 7.5 մլն-ի դիմաց:
Միևնույն ժամանակ երկրում նավթի արդյոանահանումը հասել է շուրջ 11 մլն բարելի օրական այն դեպքում, երբ ներքին շուկայի համար անհրաժեշտ է 2 մլն բարել:
Այսպիսով, սաուդյան նավթի արտահանումը Ասիայի երկրներ ավելացել է մինչև 6 մլն բարել օրական, իսկ ԱՄՆ՝ մինչև 1.5 մլն բարել, ինչը ռեկորդային ցուցանիշ է համարվում վերջին 3 տարիների համար:
Պաշտոնական Էռ-Ռիյադը բազմիցս հայտարարել է, որ պատրաստ է լրացնել նավթի դեֆիցիտը համաշխարհային շուկայում, որը կարող է առաջանալ՝ կապված ԱՄՆ-ի և ԵՄ-ի կողմից Իրանի նավթի մատակարարումների վրա էմբարգո դնելու հետ: