Այսօր կառավարության շենքի մոտ ցույց էին կազմակերպել Կոզեռն թաղամասի բնակիչները` ի նշան իրենց իրավունքների ոտնահարման: Բանն այն է, որ 2004-ից Կոզեռն թաղամասը, որը գտնվում է Պռոշյան մեկ հասցեում` Սիրահարների պուրակի անմիջապես հետնամասում, կառավարության որոշմամբ համարվել է իրացման գոտի և տրվել է «Լոկալ դևելոփըրզ» ընկերությանը` այնտեղ կառուցապատման աշխատանքներ իրականացնելու նպատակով, որը, ի դեպ, պատկանում է Սամվել Մայրապետյանին: Սակայն երեկ կառուցապատողի կողմից առաջարկվող գումարային փոխհատուցման չափը բնակիչներին զարմացրել է: պարզվում է , որ մեկ քառակուսի մետրը գնահատվել է 350-400 դոլար այն դեպքում, երբ կենտրոնում մեկ քառակուսին արժե 1500-2000 դոլար: Բնակիչները նշում են, որ իրենց պետք է համարժեք փոխհատուցում ստանալ բնակարանի տեսքով նույն տեղում, այսինքն` կառուցվող շենքերում իրենց բնակարանի քառակուսու չափ տուն ստանան: Նրանք պահանջում են ինչպես կառուցապատողի, այնպես էլ վարչապետի հետ հանդիպում: Բնակիչներն այդպես էլ չեն հասկանում, թե ով է որոշում` իրենց տունն ինչքան արժե: Բնակիչները բոլորն էլ հին են, չորս սերունդ այդտեղ բնակված, ինչպես իրենք են նշում, իրենց ձեռքով ամբողջ կյանքում տուն են կառուցել, հիմա գրոշներով ուզում են իրենց փոխհատուցել:
Բնակիչները նշում են, որ իրենց տների հարևանությամբ այնպիսի մարդիկ են ապրում, որոնց տներին մատով անգամ չեն կարող կպչել, այդ թվում` Արտեմ Սարգսյանի, «ՍԱՍ» սուպերմարկետների սեփականատեր Արտակ Սարգսյանի տներ են: Կառավարությունը որոշել է, որ նրանց տներն իրացման գոտու մեջ չեն մտնում :
Ավելի ուշ կառավարության շենք մտած բնակիչներից իմացանք, որ ներսում պայմանավորվածություն են ձեռք բերել առաջիկա օրերին հանդիպելու քաղաքապետարանի` իրացնողի հետ, որպեսզի հնարավոր լինի ընդհանուր հայտարարի գալ: