ՌԴ ֆինանսների նախկին նախարար Ալեքսեյ Կուդրինը մոտ ժամանակներս նախատեսում է հանդիպել միլիարդատեր և նախագահի նախկին թեկնածու Միխայիլ Պրոխորովի հետ: «Մենք Պրոխորովի հետ պայմանավորվել ենք առաջիկա շաբաթների ընթացքում հանդիպել և քննարկել հեռանկարները»,- գրել է նա Twitter-ի իր էջում:
Ավելի վաղ Կուդրինը հայտարարել էր, որ կնպաստի Ռուսաստանում նոր լիբերալ կուսակցության ստեղծմանը: Սակայն այն ժամանակ նախկին նախարարն ընդգծել էր, որ առաջին հերթին մտադիր է սեփական ֆոնդի ստեղծման վրա կենտրոնանալ։ Այս մասին գրում է newsru.com-ը:
«Պատրաստվում եմ ֆոնդ ստեղծել: Կառաջարկեմ օրենքներ, որոնք անպայման անհրաժեշտ է ընդունել, ինչպես նաև կաջակցեմ ռացիոնալ նախաձեռնություններին»,-նավելի վաղ գրել էր նախկին նախարարը:
«Ֆոնդը դեռ գրանցված չէ, սակայն փաստաթղթերը պատրաստ են: Այն շահույթ չհետապնդող կազմակերպություն է»,- նշում է ֆոնդի ստեղծման քննարկումներին ծանոթ աղբյուրը:
Նույն աղբյուրը նաև նշում է. «Չնայած հրաժարականին, Կուդրինը պահպանել է իր բարձր հեղինակությունը: Նա առաջ էլ էր մշտապես քննադատում իշխանություններին, սակայն ավելի հաճախ դա անում էր կուլիսների հետևում, իսկ այժմ կարող է հրապարակայնորեն անել»:
Հիշեցնենք, որ փետրվարի վերջին Պրոխորովը ևս հայտարարել էր, որ մտադիր է անկախ կուսակցություն ստեղծել և իր կայքում սկսել էր գրանցել նրանց, ովքեր ցանկություն ունեն անդամակցել: Այս հարցում նրան աջակցել է նույնիսկ Վլադիմիր Պուտինը:
