Տեխնոլոգիաներին ու հեռուստահաղորդակցությանը նվիրված կայքերը 2012 թ. առաջին տեղն են զբաղեցրել վնասակար ծրագրերի ու վիրուսային գրոհների վարկանիշային աղյուսակում, որն այսօր կազմել են գերմանական G Data հակավիրուսային ընկերության վերլուծաբանները:
G Data-ի մասնագետների պնդմամբ`16.2 տոկոս դեպքերում վնասակար ծրագրերի աղբյուր են դառնում համակարգիչների, տեխնոլոգիական կապերի, բջջային նորույթների մասին կայքերը: Երկրորդ տեղում (11.3 տոկոս) բիզնեսին նվիրված վեբ-ռեսուրսներն են` բիզնես հրատարակություններրը, գործարար նորությունների պորտալները, դասախոսությունների հնարավոր կուրսերը, բիզնեսի արդյունավետությունը բարձրացնող ծառայությունները: Երրորդ հորիզոնականում 10 տոկոսով հայտնվել են պոռնոգրաֆիկ կայքերը:
Վարկանիշային աղյուսակի առաջին տասնյակում տեղ են գտել նաև երաժշտական ժամանցային պորտալները, որոնք տեղեկություններ են տրամադրում շոու-բիզնեսի աստղերի կյանքի մասին, ճանապարհորդությունների մասին պատմող կայքերը, խաղային պորտալները:
G Data-ի վերլուծաբանները, սակայն, նկատում են, որ կայքերը ոչ միշտ են պատճառ դառնում վիրուսներով վարակվելու համար: Ցանցահեններին ավելի շատ հետաքրքրում են չտեղեկացված օգտատերերը:
G Data Software AG-ն հիմնադրվել է 1985 թ. Գերմանիայում և մասնագիտացած է մասնավոր անձանց ու կորպորատիվ ընկերությունների համար ծրագրային ապահովման համակարգերի մշակմամբ:
