Ինչպես հաղորդում է «Ազատություն» ռադիոկայանը, սիրիացիների մի մեծ խումբ, որը հետապնդվում էր Բաշար Ալ-Ասադին հավատարիմ զինվորականների կողմից, հատել է Թուրքիայի սահմանը: Այդ խմբում եղել է 189 սիրիացի՝ Իդլիբ նահանգից:
Նրանց մեջ են կանայք և երեխաներ, նախկին զինվորականներ, որոնք անցել են ընդդիմության կողմը: Փախստականները տեղակայվել են Սիրիային սահմանակից Հաթայ նահանգի վրանային քաղաքներից մեկում:
«Կառավարական զորքերը գրոհել էին քաղաքի վրա` օգտագործելով զրահատեխնիկա: Կռիվները շարունակվել են մոտ մեկ ամիս: Այնտեղ աղետալի վիճակ է: Սպանվել են հարյուրավոր խաղաղ բնակիչներ, չկա էլեկտրականություն, ջուր և սնունդ»,- ասել է Հոմս քաղաքի նախկին մի բնակիչ:
Թուրքիայի խորհրդարանի մի քանի անդամներ, որոնք այստեղ էին ժամանել նախօրեին, հայտարարել են, որ վրանային քաղաք ժամանածները կստանան քաղաքական ապաստան:
