Եվրամիությունը սիրիական ընդդիմությանը կոչ է արել համախմբվել, սատարել է կրակը դադարեցնելու մասին Քոֆի Անանի նախաձեռնությանը, Մոսկվային և Պեկինին առաջարկել է ընդունել Սիրիայի վերաբերյալ ՄԱԿ ԱԽ-ի բանաձևը և բացառել է ռազմական սցենարի կիրառումը` կոնֆլիկտի լուծման համար: Այսպիսի արդյունքներ է տվել Եվրամիության անդամ երկրների արտգործնախարարների Կոպենհագենում տեղի ունեցած հանդիպումը, որի ընթացքում քննարկվել է Սիրիայում տիրող իրավիճակը:
«Մենք Ռուսաստանին և Չինաստանին խնդրել ենք աջակցել բանաձևին: Պետք է կայուն հստակ հայտարարել որ չի կարելի լինել երկրի առաջնորդ և զանգվածային սպանություններ իրականացնել»,- Եվրամիության արտաքին գործերի և անվտանգության քաղաքականության հարցերով գերագույն հանձնակատար Քեթրին Էշթոնի խոսքերն է մեջբերում ИТАР-ТАСС գործակալությունը:
Գերագույն հանձնակատարը նաև նշել է, որ Քոֆի Անանը փորձառու դիվանագետ է, ով ձգտում է դադարեցնել արյունահեղությունը Սիրիայում:
Էշթոնի խոսքերով՝ ԵՄ-ն չի կարծում, որ ռազմական միջամտությունը կլուծի Սիրիայի խնդիրները: Նա ընդգծել է, որ Սիրիայի և Լիբիայի իրավիճակները «որակապես տարբերվում են» միմյանցից, և տարբերություններից մեկն էլ սիրիական ընդդիմության ոչ միասնական լինելն է։
