Չինաստանն արգելել է չինական ընկերություններին գնել Airbus ինքնաթիռներ՝ ի պատասխան Եվրամիության մտցրած «ածխածնի հարկի»: Այս մասին հայտնում է BBC-ն` հղում անելով EADS-ի ղեկավար Լուի Գալուային:
EADS-ի գործադիր տնօրենի խոսքով` Airbus-ը ենթարկվել է Չինաստանի «հաշվեհարդարին»:
ԵՄ-ն 2012-ից մտցրել է, այսպես կոչված, «ածխածնի հարկ»` կլիմայական փոփոխությունների պայքարի համատեքստում:
«Airbus-ը դարձել է պատասխան միջոցառումների զոհը: Չինաստանի կառավարությունը հրաժարվել է հաստատել չինական ընկերությունների կողմից այս ինքնաթիռների գնումը»,- հայտարարել է Գալուան:
Վտանգի տակ են ներկայումս 45 ինքնաթիռ` 10 հատ A380 ու 35 հատ A330:
Չինաստանը չի մեկնաբանում ստեղծված իրավիճակը, և առայժմ հայտնի չէ` արդյոք սա «պաշտոնական քաղաքականությո՞ւն» է, թե՞ ինչ-որ հնարք՝ ասում են վերլուծաբանները:
