Վենեսուելայի նախագահ Ուգո Չավեսը, որը բուժվում է Կուբայում, մտադիր է հաջորդ շաբաթվա սկզբին հայրենիք վերադառնալ: Այս մասին, ինչպես հաղորդում է Reuters-ը, ասել է Կոլումբիայի նախագահ Խուան Մանուել Սանտոսը:
Սանտոսը Չավեսի հետ հանդիպել է չորեքշաբթի՝ մարտի 7-ին: Ըստ Սանտոսի՝ զրույցի ժամանակ Չավեսը բավական առողջ տեսք և լավ տրամադրություն է ունեցել և վիրահատությունից հետո բավական արագ է վերականգնվում:
Կուբացի բժիշկները վիրահատել էին Չավեսին փետրվարի 28-ին՝ չարորակ ուռուցք հեռացնելով: Նշենք, որ սա Չավեսի երկրորդ նմանատիպ վիրահատությունն է. առաջին անգամ նրան վիրահատել էին մոտավորապես կես տարի առաջ:
Այն մասին, որ Չավեսը քաղցկեղով է հիվանդ, հայտնի է դարձել 2011 թ. ամռանը: Այդ ժամանակվանից Վենեսուելայի նախագահը մի քանի անգամ բուժման կուրս է անցնել Կուբայում:
Հիշեցնենք, որ 2012 թ. հոկտեմբերին Վենեսուելայում կանցկացվեն նախագահական ընտրություններ: Չավեսը, որը երկիրը ղեկավարում է 1999 թ. փետրվարից, բազմիցս հայտարարել է ընտրություններին մասնակցելու իր մտադրության մասին:
