Տեխասում մարտի 7-ին մահապատժին են ենթարկել 52-ամյա մեխանիկ Քիտ Թերմոնդին: Այս մասին հայտնում է Associated Press գորածակալությունը:
Քիտ Թերմոնդը մեղավոր է ճանաչվել 2001 թ. սեպտեմբերին իր նախկին կնոջ` Շերոնի և նրա ընկերոջ` Գայ Ֆերնանդեսի սպանության համար:
Ինչպես նշվում է, հանցագործությունը կատարվել է մի քանի ժամ անց այն բանից հետո, երբ դատարանը, քննելով բաժանված ամուսինների 8-ամյա տղայի խնամակալության հարցը, վճիռը կայացրել է կնոջ օգտին, և երեխային վերցրել են հոր մոտից:
Դատարանում երեխան հանդես է եկել ելույթով ու նշել, որ հանցագործությունը կատարվել է իր աչքերի առաջ:
Մահապատժից առաջ Թերմոնդը շարունակել է պնդել, որ չի սպանել իր նախկին կնոջը: «Այն, ինչ ուզում եմ ասել, այն է, որ ես անմեղ եմ: Երդվում եմ Աստծով, ես նրան չեմ սպանել»,- հայտարարել է մեղադրյալը:
Նրան մահապատժի են ենթարկել մահացու ներարկման միջոցով: Մահը վրա է հասնում սրսկումից 11 րոպե անց:
Տեխասը մահապատիժների թվով ԱՄՆ-ում առաջատարն է: Թերմոնդի մահապատիժը տարեսկզբից արդեն երրորդ դեպքն է: Անցած տարի նահանգում մահապատժի է ենթարկվել 13 հանցագործ:
