Տոհմային երինջների առաջին խմբաքանակը՝ մոտ 250 գլուխ անասուն, ապրիլին Շվեդիայից, Չեխիայից և Գերմանիայից կբերվի Հայաստան: Ինչպես այսօր լրագրողների հետ հանդիպմանը հայտնեց գյուղատնտեսության փոխնախարար Գրիշա Բաղյանը, դրանից հետո երինջների նոր խմբաքանակ կստանանք ամռանը, իսկ երրորդ խմբաքանակը՝ աշնանը:
Ըստ նրա՝ տավարաբուծության զարգացման 2007-2008թթ. ծրագրով անցած տարի շուրջ 1200 տոհմային երինջ է ներմուծվել, որից ստացվել է շուրջ 1000 հորթ և բաժանվել մյուս տնտեսություններին:
Գ.Բաղյանը կարևորեց 6 մարզերի 55 համայնքներում իրականացվող ՀԲ ծրագիրը, որի շրջանակներում տարեկան շուրջ 20 հազ. կով արհեստական եղանակով կբեղմնավորվի՝ Եվրոպայից բերված բարձր մթերատու ցուլերի սերմնահեղուկով. «Մինչև 2020 թ. կունենանք արհեստական բեղմնավորմամբ 10 հազ. կով»:
Փոխնախարարը հայտնեց, որ անցած տարի շուրջ 2 հազ. խոյ և մաքիներ են ներմուծվել Եվրոպայից և բաշխվել տնտեսություններին. «Հիմնականում այնպիսի ոչխարներ են, որոնցից տարվա ընթացքում հնարավոր կլինի ստանալ 3-4 սերունդ: Գյուղնախարարության կողմից ընդունվել է ոչխարաբուծության հայեցակարգ, որի համաձայն՝ մինչև 2020 թ. դրանց թիվը պետք է հասցվի մինչև 1.5 մլն-ի»:
