Թուրքական Hürriyet թերթի փոխանցմամբ՝ Anonymous ցանցահենային խումբը հարձակվել է Թուրքիայի վարչապետական ապարատի կայքի վրա: Սակայն թուրք կիբեր մասնագետները հետ են մղել այդ հարձակումը: Նշվում է, որ նրանք նախապես իրազեկվել են Anonymous-ի պլանավորած հարձակման մասին և ձեռնարկել են համապատասխան կանխիչ միջոցներ:
Հիշեցնենք, որ 2010 թվականի հոկտեմբերի վերջին Թուրքիայում ընդունված նոր «Կարմիր գրքում» (որն այլ կերպ անվանում են նաև «կարմիր սահմանադրություն», «գաղտնի սահմանադրություն») ընդգրկված արտաքին սպառնալիքների թվում առաջին անգամ ավելացել էր կիբերհարձակումը։
«Կարմիր գիրքը» թարմացվում է յուրաքանչյուր 5 տարին մեկ, և ըստ դրա՝ նրանում նոր փոփոխություններ են կատարվում՝ կապված արտաքին ու ներքին սպառնալիքների վերախմբագրման հետ։ Նախկինում այդ փոփոխությունները հիմնականում իրականացնում էր գլխավոր շտաբը, սակայն ներկայումս վարչապետ Էրդողանն այդ մենաշնորհը վերցրել է գլխավոր շտաբի ձեռքից։