ՀԱԿ-ը իր գերխնդիրը չի կատարել: Այսօր լրագրողների հետ հանդիպման ժամանակ նման տեսակետ հայտնեց Հայ ազգային կոնգրեսի քաղխորհրդում «Հայ կամավորականների համախմբում» ազգային-քաղաքական նախաձեռնության ներկայացուցիչ, 1992-94թթ. Գորիսի քաղաքապետ, ինքնապաշտպանության կոմիտեի նախագահ Սամվել Հարությունյանը՝ ներկայացնելով օրեր առաջ ՀԱԿ համամասնական ցուցակում ընդգրկվելուց հրաժարվելու դրդապատճառները:
Հիշեցնենք, որ ՀԱԿ համամասնական ցուցակում ընդգրկվելուց հրաժարվել էին «Հայ կամավորականների համախմբում» ազգային-քաղաքական նախաձեռնությունը, Սոս Գիմիշյանի, Գառնիկ Մարգարյանի և Վաղարշակ Հարությունյանի ղեկավարած կուսակցությունները:
Ասուլիսի բանախոս Ս. Հարությունյանը ընդգծեց՝ խոսելու է միայն իր անունից: Նա մանրամասնեց, որ երեքուկես տարի, իբրև նախաձեռնության ներկայացուցիչ, մասնակցել է ՀԱԿ քաղխորհրդի նիստերին, անդամակցել քաղխորհրդին, սակայն այլևս չի անդամակցում:
«ՀԱԿ կենտրոնական գրասենյակի տարածած հաղորդագրությամբ նշվել էր, որ քաղաքական ուժերից չորսը հրաժարվել են ընդգրկվել ընտրական ցուցակում: Հաղորդագրության մեջ նշված չէր պատճառը: Եթե մեկ նախադասությամբ ասեմ՝ հրաժարվել ենք գլխավորապես ՀԱԿ մարտավարության և ռազմավարության շուրջ ունեցած տարաձայնությունների պատճառով՝ համամասնական ցուցակի կազմման սկզբունքի վերաբերյալ:
Վերջին տարիներին քաղխորհրդի նիստերն անցել են շատ բուռն: Ցավոք, նիստերին հնչած շատ լուրջ առաջարկներ համապատասխան ուշադրության չեն արժանացել։ ՀԱԿ հռչակագրում ամրագրված կետերից միայն մեկն է կատարվել՝ քաղբանտարկյալների ազատ արձակումը, իսկ գերխնդիրը՝ արտահերթ ընտրությունների պահանջը, չի կատարվել»,- մեկնաբանեց բանախոսը՝ հավելելով, որ ՀԱԿ քաղխորհրդի վերջին նիստի բուռն քննարկումները շարունակվել են նաև նեղ շրջանակներում՝ թե՛ մարտավարության, թե՛ համամասնական ցուցակի վերաբերյալ:
Ըստ նրա՝ այս հարցերի հետ կապված 13 ուժեր եկել էին փոխհամաձայնեցված տարբերակի: Նա ցավով նշեց, որ ՀԱԿ-ի կողմից վիժեցվեց կոնսենսուսի հասնելու իրենց ձգտումը:
Անդրադառնալով մարտիմեկյան հանրահավաքին՝ Ս. Հարությունյանն ասաց, որ դրան պետք էր նախապատրաստվել լավագույն ձևով: Նա տեղեկացրեց, որ պատրաստել էր հայտարարության նախագիծ, որով հանրահավաքի ժամանակ պետք է հաստատվեր, որ մարտի 9-ին, ժամը 16:00-ից, Ազատության հրապարակը նորից պետք է դառնա բարոյական օազիս և ոգեղեն խոյանքի էպիկենտրոն, հանդուգն վճռականությամբ կոփի բաղձալի հաղթանակ և օր առաջ հասնի Մարտի 1-ի արյունով արբեցած Սերժ Սարգսյանի պաշտոնանկությանը, ազգային համաձայնության ժամանակավոր կառավարության կազմավորմանը և ՀՀ նախագահական արտահերթ և ՀՀ ԱԺ օրինակելի ընտրությունների անցկացմանը:
Այս նախագիծը չի ընդունվել, որը չի գոհացնում Սամվել Հարությունյանին, և նա այժմ ՀԱԿ քաղխորհրդի անդամ չէ և կմասնակցի միայն հանդուգն գործողությունների:
