Հայաստանի ՊՆ քննչական ծառայության հասարակայնության հետ կապերի բաժնի ավագ սպա Մերի Սարգսյանը «Առաջին լրատվական»-ի հետ զրույցում հայտնեց, որ փետրվարի 23-ին ժամը 13:50-ի սահմաններում ՀՀ ՊՆ N զորամասի մարտական հենակետում, գլխի շրջանում մահացու հրազենային վիրավորում ստացած ժամկետային զինծառայող, 19-ամյա շարքային Ալբերտ Արմենակի Ադիբեկյանի մահվան փաստի առթիվ ՀՀ ՊՆ քննչական ծառայության 6-րդ կայազորային ծառայության քննչական բաժնում ՀՀ Քրեական օրենսգրքի 104 հոդվածի 1-ին մասով հարուցված քրեական գործի նախաքննության ընթացքում պարզվել և հիմնավորվել է, որ վերջինը սպանվել է ոչ թե հակառակորդի, այլ համածառայակցի` նույն զորամասի ժամկետային զինծառայող շարքային Իգնատ Աշոտի Ենգիբարյանի կողմից արձակված գնդակից:
Ենգիբարյանին մեղադրանք է առաջադրվել Հայաստանի քր.օր.-ի 104-րդ հոդվածի 1-ին մասով (Սպանություն) և նրա նկատմամբ որպես խափանման միջոց է ընտրվել կալանավորումը: Ըստ ՊՆ քննչական ծառայության, որ Ադիբեկյանի՝ հակառակորդի կողմից սպանվելու վարկածի սկզբնաղբյուր է հանդիսացել Ենգիբարյանը:
Նշենք, որ Հայաստանի պաշտպանության նախարարությունը զինվորի սպանությունից հետո տեղեկություն էր տարածել, որ Ադիբեկյանը սպանվել է հակառակորդի արձակած գնդակից:
