Ռուսական Regnum լրատվական գործակալության փոխանցմամբ՝ Ադրբեջանի նախագահ Իլհամ Ալիևը հեռախոսազրույց է ունեցել Ռուսաստանի նորընտիր նախագահ Վլադիմիր Պուտինի հետ և շնորհավորել նրան նախագահական ընտրություններում տարած հաղթանակների առթիվ: Այս մասին նշված է Ադրբեջանի նախագահի պաշտոնական կայքում:
Նշվում է, որ հեռախոսազրույցի ժամանակ կողմերը գոհունակություն են հայտնել տարբեր ոլորտներում երկկողմանի հարաբերությունների զարգացման կապակցությամբ և վստահություն են հայտնել, որ դրանք է՛լ ավելի են ամրագրվելու հետագայում:
Բացի այդ, Ալիևը Պուտինին հրավիրել է այցելել Ադրբեջան՝ վերջինիս համար հարմարավետ ժամանակ:
Հիշեցնենք, որ արդեն բավական երկար ժամանակ է, ինչ Ռուսաստանն ու Ադրբեջանը չեն կարողանում համաձայնության գան Գաբալայի ռադիոտեղորոշիչ կայանի պայմանագրի երկարաձգման շուրջ: Նշվում է, որ ադրբեջանական կողմը պահանջում է 43 անգամ ավելացնել վարձավճարը՝ այն 7 միլիոն դոլարից հասցնելով 300 միլիոն դոլարի:
