Թուրքական Zaman թերթի փոխանցմամբ՝ այսօր պայթյուն է գրանցվել Անկարայի Վճռաբեկ դատարանի շենքի առջև: Նախնական տեղեկություններով՝ պայթեցվել է ձայնային ռումբ: Թեթևակի վիրավորվել է 1 մարդ:
Պայթյունը տեղի է ունեցել վարչապետական նստավայրից 200 մետր հեռավորության վրա: Դրանից մոտ մեկ ժամ անց իր նստավայր է ժամանել վարչապետ Էրդողանը՝ նախարարների խորհրդի նիստ գումարելու համար:
Հիշեցնենք, որ վերջին օրերին մի շարք պայթյուններ տեղի ունեցան և կանխվեցին Ստամբուլում: Ավելի վաղ Zaman-ը գրել էր, որ Թուրքիայում ահաբեկչական հռչակված ու արգելված Քրդստանի աշխատավորական կուսակցությունը (PKK)-ն պլանավորել է մինչև Նովրուզ մի շարք արյունալի գործողություններ իրականացնել Թուրքիայի ողջ տարածքում:
Այդ նպատակով PKK-ն Թուրքիա է գործուղել իր 50 ներկայացուցչի, որոնք նախապես 3 շաբաթ շարունակ «ռմբային կրթություն» են ստացել Ղանդիլում (Հյուսիսային Իրաք): Դրա հետ կապված` Թուրքիայի անվտանգության ուժերում հայտարարվել է «կարմիր տագնապ»:
