Աբովյան քաղաքի Զոքանչի լեզու կոչվող ամենամեծ և երկար շենքի իններորդ հարկում այս օրերին սուգ է: Այստեղ են հավաքվել դեռ ինն ամիս առաջ Լեռնային Ղարաբաղի «Եղնիկներ» զորամաս զորակոչված և փետրվարի 29-ի առավոտյան սպանված 19-ամյա զինծառայող Տիգրան Վարյանի մտերիմները, հարևանները և ընկերները:
Տիգրանի մահվան լուրը ցնցել է բոլորին: Հարևան Վիլսոնի աչքերի առաջ է մեծացել Տիգրանը, նրա խոսքերով՝ Տիգրանը համեստության տիպար էր, մեծերին հարգող, դաստիարակված տղա:
Երկու օր առաջ Տիգրանը խոսել է տնեցիների հետ, ասել, որ ամեն բան նորմալ է: Ի դեպ, մինչև Տիգրանի ծառայությունը, նույն «Եղնիկներում» ծառայել է նրա ավագ եղբարը՝ Յուրա Վարյանը: Վեց ամիս եղբոր հետ ծառայելուց հետո Յուրա Վարյանը զորացրվել է. «Քուրիկ ջան, հասարակ տրամաբանություն, մարդը, որը պետք ա մոտ օրերս գար օտպուսկ, ինքնասպանություն կգօրծե՞ր»,- ասաց ընկերներից մեկը. բոլորն էլ վստահ են, որ զինվորին խոշտանգել են բանակում:
Դասընկերներից Հովիկը «Առաջին լրատվական»-ի հետ զրույցում պատմեց, որ դպրոցում Տիգրանը հարվածային է սովորել, ծառայության ավարտից հետո շատ ծրագրեր ուներ, մինչև բանակ գնալն ատամնատեխնիկի գործն էր սովորում, բայց բանակից վերադառնալուց հետո ոսկերչություն էր որոշել սովորել: Տիգրանը բանակում ծառայելու ընթացքում խոսել է ընկերոջ՝ Հովիկի հետ, ասել, որ ծառայությունը շատ լավ է ընթանում, դժգոհելու առիթ չունի. «Շատերը գնում են, չեն հարմարվում, բայց ինքը չի եղել, որ մի անգամ գոնե բողոքի»,- ասաց ընկերը՝ նշելով, որ դպրոցում Տիգրանն իր ամրակազմ կառուցվածքով ֆիզիկական դաստիարակության դասին մեկ անգամ չէ, որ աչքի է ընկել. «Մի անգամ դասից փախել էինք, տնօրենը եկավ, բոլորի վրա հատ առ հատ խոսում էր, հասավ Տիգրանին, տեսնեիք Տիգրանի կարմրությունը, բազուկի գույն»,- հիշեց ընկերը:
«Շենքի ամենավատ մարդն իսկ լավը կխոսի նրա մասին, որովհետև իսկապես անթերի էր: Էսօր իմ հարևանի երեխան է, աշունը, վաղն էլ իմն է գնալու, ի՞նչ ենք անելու, էս ի՞նչ է կատարվում, այս ի՞նչ բանակ եք պահում: Բոլոր բնակիչների կողմից եմ ասում՝ խելոք ընտանիք է, համեստ ընտանիք, հավեսով մարդիկ են, Տիգրանը անցնում անգամ ամաչում էր բարև տալ, այ այդքան համեստ երեխա էր, բոլորի կողմից սիրած հարգված ընտանիք է»,- նշեց հարևաններից Վահանը:
Հիշեցնենք, որ ավելի վաղ Հելսինկյան ասոցիացիայի փորձագետ, դիահերձման մասնակից Ռուբեն Մարտիրոսյանը նշել էր, որ նրան սպանել են, որ ոչ մի ինքնասպանություն չկա. երեխային ծեծել են, խոշտանգել, դրան էլ անմիջապես հաջորդել է մահը:
«Ցավոք Տիգրան Վարյանի սպանությունը հաստատեց, որ այդ զորամասում դժոխք է տիրում, ինչպես ՀՀ բոլոր զորամասերում, ստրկատիրական կարգեր են, զինվորներն այնտեղ ոչ թե հայրենիքն են պաշտպանում, այլ փորձում են իրենց կյանքը պաշտպանել և հաճախ դա չի հաջողվում»,- նշել էր փորձագետը՝ ավելացնելով, որ մասնակցելով դիահերձմանը հայտնաբերել են մարմնական վնասվածքներ Վարյանի մարմնի վրա, վնասվածքներ դեմքի տարբեր հատվածներում, քթի ձախ և միջին հատվածի շրջանում, միջնապատի շրջանում, վնասվածքներ բերանի աջ և ձախ շրջանում` շրթունքների կողքը, վնասվածքներ ծնոտի ներքևի հատվածում, հրազենային մուտքի վնասվածքից փոքր ինչ ներքև:
Մինչդեռ Տիգրան Վարյանի մահվան առիթով Քրեական օրենսգրքի 110 հոդվածի 1-ին մասով է գործ հարուցվել (ինքնասպանության հասցնելը):
