ՄԱԿ-ի գլխավոր քարտուղար Պան Գի Մունը դեմ է «Սիրիայի ընդդիմության հետագա ռամականացմանը» և կոչ է արել պաշտպանել Քոֆի Անանի միջնորդական առաքելությունը, հաղորդում է ITAR-TASS-ը:
Պան Գի Մունը հայտարարել է, որ Սիրիայի ընդդիմության հետագա ռազմականացումը ի վիճակի չէ լուծել երկրում շարունակվող ճգնաժամը:
Ելույթ ունենալով Գլխավոր Ասամբլեայի լիագումար նիստին՝ նա կոչ է արել միջազգային հանրությանը «շտապ միասնական դիրքորոշում մշակել՝ ստիպելու Սիրիայի իշխանություններին և մյուս բոլոր կողմերին դադարեցնել բռնությունը»:
Գլխավոր քարտուղարն իր խոսքում խիստ քննադատական արտահայտություններ է ուղղել Սիրիայի իշխանություններին, որոնք, նրա խոսքերով, «չեն կատարել իրենց պարտականությունները բնակչության պաշտպանության հարցում»:
Նրա խոսքերով՝ հենց «Սիրիայի իշխանությունների կողմից ուժի անհամաչափ կիրառումն է ստիպել մեծ հաշվով խաղաղ տրամադրված բնակչությանը որոշ դեպքերում զենք վերցնել»:
Ընդ որում, Պան Գի Մունը նշել է, որ «ընդդիմության կրակային ուժը, կարծես թե նվազագույնն է, համեմատած սիրիական բանակի կողմից օգտագործվող ծանր զենքի հետ»: Նա փաստել է, որ զինված ծայրահեղականները նույնպես օգտվում են ստեղծված իրավիճակից՝ իրենց նպատակներն առաջ մղելու համար հատկապես Դամասկոսում և Հալեպում:
Պան Գի Մունը նաև հաստատել է մի քանի օր առաջ իր տեղակալի բերած այն փաստերը, որ Սիրիայում մեկ տարվա ընթացքում զոհերի թիվը գերազանցել է 7500-ը:
Պան Գի Մունը կոչ է արել միջազգային հանրությանը ստիպել Սիրիայի իշխանություններին թույլատրել միջազգային կազմակերպության աշխատակիցներին մուտք գործել տուժած շրջաններ և օգնություն ցուցաբերել բնակչությանը: Նրա խոսքերով՝ հենց այդ խնդիրն է դրված Քոֆի Անանի վրա:
«Անանը կաշխատի այն ուղղությամբ, որ վերջ դրվի բռնությանը և մարդու իրավունքների խախտումներին, նպաստի Սիրիայի ճգնաժամի խաղաղ կարգավորմանը»,- ասել է նա:
