Բանակում գրանցվող մահվան յուրաքանչյուր դեպք մտահոգում է Պնախարար Սեյրան Օհանյանին, և նրա պահանջը շատ սկզբունքային է՝ բանակում բացառել մահվան դեպքերը: «Առաջին լրատվական»-ի հետ զրույցում ասաց պաշտպանության նախարարին առընթեր հասարակական խորհրդի նախագահ, Պնախարարի խորհրդական Գեղամ Հարությունյանը:
«Անցած տարվա դրական դինամիկան որոշ չափով, միգուցե, խախտվել է, և սա նույնպես անհանգստացնող է: Սակայն ՊՆ-ը համապատասխան քայլեր է ձեռնարկում, որպեսզի բանակում զգոնության թուլացման պահեր չլինեն, և առաջիկայում հնարավորինս բացառվեն նմանօրինակ դեպքերի կրկնությունները: Դեպքերն իրենց բնույթով տարբեր են լինում: Ռազմական վերջին կոլեգիայի նիստում շեշտադրվեց զինվորական կարգապահության ամրապնդմանն ուղղված միջոցառումների անհրաժեշտությունը: Նմանօրինակ միջոցառումները կշարունակվեն նաև առաջիկայում: Կարծում եմ, այնուամենայնիվ, վիճակը վերահսկելի է»,- ասաց նա:
Ամփոփելով՝ Գեղամ Հարությունյանը տեղեկացրեց, որ իրենց հասարակական խորհուրդն ամենամսյա ստուգումներ է իրականացնում տարբեր զորամասերում: «Երեք զորամասերում շրջայցեր նախատեսված են նաև մարտ ամսին»,- ասաց նա:
Նշենք, որ այս տարվա երկու ամիսների ընթացքում Հայաստանի զինված ուժերում գրանցվել է մահվան 8 դեպք: Մահացած 8 զինվորներից երեքը, ըստ պաշտոնական վարկածի, ինքնասպան են եղել, մեկը սպանվել է: Մի զինվոր զոհվել է հրադադարի ռեժիմի խախտման հետևանքով, մեկը` արձակուրդի ժամանակ վթարի, երրորդը` թոքաբորբի, չորրորդը` զենքի հետ վարման կանոնների խախտման հետևանքով: Վերջին` ութերորդ դեպքը, գրանցվել է երեկ: Զորամասերից մեկում մահացել է շարքային զինծառայող, Աբովյան քաղաքի բնակիչ Տիգրան Վարյանը: Արդեն հարուցվել է քրեական գործ ինքնասպանության հասցնելու մեղադրանքով:
