Ինչպես Интерфакс գործակալությանը հայտնել է N7 հիվանդանոցի աղբյուրը, քաղաքային հիվանդանոցում մահացել է այսօր Մոսկվայի հարավում սպանված Իրինա Զիրոյանի թիկնապահը, ով վիրավորվել էր հրազենից:
Թիկնապահը ծանր վիճակով տեղափոխվել էր հիվանդանոց` վերակենդանացման բաժին, սակայն նրա կյանքը փրկել չի հաջողվել:
Հիշեցնենք, որ երեկ Մոսկվայում անհայտ անձինք կրակել են գործարար Իրինա Զիրոյանի վրա: Այդ մասին հաղորդել էր RIA Novosti-ն՝ վկայակոչելով երկրի իրավապահ մարմիններին:
Ոստիկանությունից հայտնել էին, որ Իրինա Զիրոյանը թիկնապահի հետ եկել էր ճաշելու «Տանուկի» ռեստորանում: Երբ նա դուրս է եկել այնտեղից և մոտեցել մեքենային, երկու հոգի կրակ են բացել նրա և թիկնապահի վրա: 52-ամյա Զիրոյանը տեղում մահացել է: Նրա թիկնապահ Վալերի Ֆիլատովը ծանր վիրավորվել և տեղափոխվել էր վերակենդանացման բաժին:
RIA Nowosti-ի իրավապահ մարմինների աղբյուրը հայտնել է, որ Զիրոյանի սպանությունը, ամենայն հավանականությամբ, պատվիրված է եղել: