Մարտի 1-ից հետևություններ, առաջին հերթին, պետք է աներ իշխանությունը, բայց դատելով «Արտակարգ դրության իրավական ռեժիմի մասին» օրինագծի այսօրվա քվեարկությունից, կարելի է փաստել, որ կատարվածից ոչ մի դաս էլ չի քաղել: «Առաջին լրատվական»-ի հետ զրույցում այս մասին ասաց ՀԱԿ ներկայացուցիչ Սուրեն Աբրահամյանը:
«Ընդհակառակը, իշխանության գործողություններում եղածը կոծկելու և ապագային նախապատրաստվելու միտում եմ տեսնում: Ինչ վերաբերում է հասարակությանն ու ընդդիմությանը, ապա նրանք անելիք ունեն հետևյալ իմաստով. եթե մի անգամ էլ իշխանությունը նման վարքագիծ դրսևորի և աթոռ պահելու համար սեփական ժողովրդի վրա զենք բարձրացնի, ապա հասարակությունը ոչ մի բանի առաջ չպետք է կանգ առնի և նոր մարտի մեկեր չհանդուրժի»,- նշեց նա:
Նշենք, որ այսօր Ազգային ժողովը առաջին ընթերցմամբ կողմ է քվեարկել «Արտակարգ դրության իրավական ռեժիմի մասին» օրինագծին: Օրինագիծն անցել է 67 կողմ, 1 դեմ և ոչ մի ձեռնպահ ձայների հարաբերակցությամբ: Օրինագծին կողմ է քվեարկել միայն կառավարող կոալիցիան, իսկ ՀՅԴ և «Ժառանգություն» խմբակցությունները չեն մասնակցել քվեարկությանը:
Ընդդիմությունը օրենքի նախագիծն անընդունելի է համարում, քանի որ այդ օրենքով սահմանափակվում են խորհրդարանի լիազորությունները, նաև նախադեպ է ստեղծվում զինված ուժերը ներքաղաքական գործընթացներում օգտագործելու համար, ինչը հակասում է Սահմանադրությանը:
